Accessibility links

Rusiä demokratları kongressında nilär bar?


Mäğlüm ki 12 dekaberdä, Mäskäwdä “Rusiä demokratiä yağında, diktaturağa qarşı” digän Gomümrusiä grajdannar kongressı uzdı. Kongressqa meñgä yaqın keşe, şularnıñ sigez yöze töbäklärdän cıyılğan bulğan. Tatarstannan öç keşe qatnaşqan, alarnıñ qayberläre düşämbe könne Qazanğa qaytıp töşte inde. “Yabloko” wäkile itep çaqırılğan İrek Mortazin belän Qazan vokzalında qorğan qısqa ğına äñgämädä, ul, Tatarstannan kongressta tağın däwlät şurası deputatı Aleksandr Ştanin häm xoquq yaqlaw waqifı wäkile Gusev qatnaşuları turında äytä. Kongresnı säyäsätçe Georgiy Satarov başlap cibärgän. İñ yañğırawıqlı çığışlarnıñ bersen tanılğan şaxmatist Ğarri Kasparov yasağan. Anıñ fikerençä, Rusiädäge xäzerge xakimiät belän oppozitsiä arasında dialog bulırğa mömkin tügel. Xäzerge xäkimiät-xättä GKÇPda tügel. Çönki bu xakimiät kiräk bulsa uramnardan tanklarnı almayaçaq, xäzerge xakimiätneñ keşe xoquqlarına allergiäse yuq digän Ğarri Kasparov. Ğarri Kasparov Rusiä konstitutsiäse köne bäyrämen ğämäldän çığaruğa qarata da kisken fiker äytkän. Mäğlüm ki kongress Rusiä konstitutsiäsen soñı tapqır bäyräm itep bilgeläp ütkän könne bardı. Bu könne Rusiä prezidentı konstitutsiä üzgäreşsez qala dip beldergän ide. Ä kongressta bötenläy başqa käyeflär bulğan ikän. “Moskovskie novosti” gazetasınıñ baş möxärrire Yevgeniy Kiselev-,xäkimiät xalıq äzräk iskä alsın dip, añlı räweştä konstitutsiä könen beterde” digän häm konstitutsiäne arabızdan kitkän keşelärne iskä alğan kebek, basıp iskä alırğa täqdim yasağan. Ä Ğarri Kasparov bu fiker belän tulısınça kileşep çığışında açıq itep-“xäkimiät konstitutsiäne üzgärtergä cıyına” digän. “İkeseneñ berse, yä xäzerge xakimiät qala, yä konstitutsiä. Min konstitutsiäne saylıym” digän ataqlı şaxmatist.

Mäskäwdä ütkän demokratlar kongressı öç dokument qabul itkän. Berse- Rusiädäge säyäsi ezärlekläwlärgä qarşı protest. İkençese Çeçnyadağı wäzğıätkä qarata möräcäğät. Häm töp dokument- Rusiädäge wäzğıät turında deklaratsiä. Deklaratsiädä- “Rusiä xalıqları xakimiät orğannarın turıdan turı saylap quyuğa ayırılğısız xoquqlarğa iä” dielgän. Deklaratsiädä şulay uq bäysez mäğlümat çaraların yuqqa çığaru säyäsäte belän kileşmäw belderelgän. Kongressta qatnaşuçı jurnalistlar, anda Rusiä mäğlümat çaralarınıñ az buluına, berniqädär mäğlümäti izolyatsiä sizelüenä dä iğtibar itkännär. Yunıs Ätnäle.

XS
SM
MD
LG