Accessibility links

якшәмбе, 4 декабрь 2016, Казан вакыты 15:21

Tatar ictimaği üzäge millättäşlärebezgä möräcäğät itä


Şuşı yallarda ğına Mari respublikası häm Perm’ ölkäsendä saylawlar uzaçaq. Marilılar 19 dekaberdä üzläreneñ ölkä citäkçelären saylarğa cıyına. Bötentatar ictimaği üzäge dä älege waqiğadan çittä qalmadı, dip xäbär itte Azatlıq radiosına Tatar ictimaği üzäge räise Räşit Yağfarov. Mari ictimaği üzäge wäkilläre belän teläktäşlek kürsätep, alar İdel-Ural regional’ ictimaği xäräkäte belän bergälektä Mari respublikasında yäşäwçe millättäşlärebezgä möräcäğät qabul itkännär. Meñyıllıq tarixı bulğan, dönyadağı fin-uğır xalıqları berdämlegeneñ ber asıl öleşen täşkil itkän millätneñ tele qıyırsıtıla, respublikada milli mäğrifät, sänğät, mädäniät oyışmaları yabıla. Respublika xalqınıñ citeşle häm matur tormışqa xaqı bar. Yazmışığıznı xäl itü üzegezneñ qulda, dip yazıla älege möräcäğättä.

Şul uq 19 dekaber könne Perm’ ölkäseneñ Barda rayonında da saylawlar uzaçaq. Anda rayon xalqı xakimiät başlığın saylayaçaq. Perm’ ölkäsendä tuıp üsep, xäzerge waqıtta Tatarstanda yäşäwçe Perm’ tatarları cämğiäte wäkilläre häm Tatar ictimaği üzäge andağı millättäşlärgä dä möräcäğät itkännär. Möräcäğättä tatarstanlılar kiläse saylawlarda millättäşebez Xälil Äbubäkirovnı yaqlap çığarğa täqdim itälär. Şulay itep, Tatar ictimaği üzäge Barda rayonı millättäşlärebezne tuğan yaqnıñ kiläçägen bilgeläwçe waqiğadan çittä qalmasqa çaqıra. Häm saylanaçaq xakimiät başlığına Bardada yäşäwçe tatarlarnıñ ruxi üseşenä, alarnıñ mädäni qıyblası – Tatarstan belän traditsion bäyläneşlären nığıtuğa iğtibarın arttırırğa täqdim itä.

Şulay uq Räşit Yağfarov dekaber başında uzğan Tatar ictimaği üzäge prezidiumı utırışınıñ näticäläre belän dä tanıştırdı. İctimaği üzäk üzeneñ çirattağı qorıltayın 2005 yılnıñ 2 aprelendä ütkärergä qarar qılğan. Qorıltaynı uzdıru komissiäseneñ räise itep Räis Ğabdullin saylanğan. Ul 2 aprel’dä uzaçaq yaña saylawlarğa qädär İctimaği üzäk räise wazifaların da başqaraçaq.

Gölnaz İlgizär

XS
SM
MD
LG