Accessibility links

җомга, 2 декабрь 2016, Казан вакыты 23:00

Finländiä tatar cırçısı Qazanda


Qazanda häm ğomumän Tatarstanda talantlı şağir, kompozitor, cırçı bulu belän berkemne dä şaqqatıra almıysıñ. Ä inde görläp torğan konsert zallarında ütüçe bersennän - berse yaña programmalar häm berdän - ber şäxeslärneñ sanı zäwıqlı tamaşaçılar sanına yaqınlaşa. Citmäsä ağımdağı premyeralarğa häm mädäni çaralarğa östämä bulıp avgust ayı sanduğaçı Salawatnıñ bıyılğı konsertı bu atnanıñ düşämbe, sişämbe, pänceşämbe kiçläre dä Qamal teatrı binasında ütä.

Cäy axırında Salawat UNİKSta çığış yasasa da, barıber, Kamalğa kermiçä tınıçlana almıy dilär. Cırçı belän bergä çit illärdäge avtomobil' yarışında qatnaşuçı dusları da irkenläp kilep konsert qarıy.Salawat-Salawat inde ul. Anıñ ğadi yeget bulıp cırlawları, qılanuları küptän tanış, läkin barıber yış qına şaqqatıra. Tamaşaçı qaywaqıt suqransa da, barıber, Salawat yanına bara. Başqa cırçılarğa Salawat belän tamaşaçı öçen yarışu bik qıyın dilär. Näq şuşı könnärdä Qazannı yaulaw öçen Xelsinkidan kilgän tatar cırçısı Cämilä Kärim Tinçurin teatrı binasında çığış yasıy. Oçraqlı räweştäme, ällä maxsusmı Cämiläneñ Qazandağı berençe möstäqıyl konsertı näq Salawat konsertı barğan könnärenä turı kilgän. Dimäk, soñğı 12 yılın Finländiädä ütkärep, şunda 3 bala üstergän, üze yazğan şiğerlärgä üze köy yazıp, şularnı üze cırlıy torğan Cämilä avtouzıyşçı häm awıl qaharmanı Salawat belän tamaşaçı yöräge öçen köräşäçäk. Xäzergä Salawatnıñ canatarları häm anı tıñlarğa kilüçelär kübräk bulsa da, zamança çit ildä moñ saqlawçı tatar icatçıları torğan sayın tansığıraq bula bara. Şuña kürä Perm yaqlarında üskän häm Xelsinkinı, Peterburgnı yaulağan Cämilä Qazannı alırğa qayttı. Tönlä oçqıç belän qaytqaç ta ul irtänge 7 säğättä “Tatarstan-Yaña Ğasır” telekanalınıñ turı efirına kilde, annan soñ “Azatlıq” radiosınıñ Qazan byurosına kerde. Menä Cämilä belän söyläşüneñ ber özege.

Xäzer xalıqnı şaqqattırıp bulmıy. Konvert belän xat alışuçı da yuq bit xäzer. Bötenese internet aşa yazışa. Qazanğa yılğa ber genä kilä alam min. Çönki öç bala belän yış kilep bulmıy. Äle Piterda, Tallinda konsertlarım buldı. Menä xäzer Qazanda. Annarı Çallı, Mäskäw, Riga, Berlin kötä. Xalıqnı şaqqattıram dimim min. Läkin keçkenä genä söyeneçlär bulaçaq. Mäsälän, Aydar Ğäynullin, Yevropanıñ öç super bayançılarınıñ berse. Ul älegä qädär cırlamıy ide, Qazanda berençe märtäbä cırlayaçaq. Bez anıñ belän duet başqaraçaqbız.

Bu yulı, möğayın, Cämilä Salawatnı uzıp kitä almas, ämma zamança estetika, 21 ğasırdağı tatar yäşläre standartları belän ul Qazannıñ häm tatar sänğäteneñ zäwığın üzgärtäçäk. Şulay itep, 15, 16 dekaberdä Qazan cırçılarınnan ayırılıp torğan tatar estradası yoldızı Tinçurin teatrında çığış yasıy.

Rimzil Wäli

XS
SM
MD
LG