Soñğı könnärdä ülem -töşemnär, yuğaltular küp buldı. Dekabristlar uramında tramvay tuqtalışına kilep mengän Jiguli maşinası Yäşel üzännän sport yarışına kilgän ike yäşüsmerne taptağan. Maşina yörtüçe yeget Saratovta terkälgän avtomobilen qaldırıp qaçıp kitkän. Uzğan yäkşämbedä Çistaydan yıraq tügel Çıtırçı awılı yanında Bawlı şähäreneñ 3 balıqçısı belän äle tuñıp ta betmägän yılğağa avtobus töşep kitä. Avtobus yörtüçese belän ber passajir bu bälädän qotılıp çığalar.Ä 70 yäşlek ir-atnı vodolazlar suğa batqan avtobusnıñ salonında artqı urındıqlarda tabalar. Yul häm tabiğät qazasında bälägä oçrawdan başqa, yöräge tuqtağan ölkän keşelär belän xuşlaşu da ciñel tügel. Ozaq yıllar buyı awıl xucalığında eşlägän Timerxan Borhanovnıñ wafatı säbäple Respublikanıñ iñ zur citäkçeläre qayğı urtaqlaştı. Timerxan Borhanov turında Ğarif Axunov kitap yazıp bastırğan ide . Xäzer inde yazuçı da , anıñ yaratqan geroe da gür quyınında. Awır tufrağı ciñel bulsın. Timerxan Borhanovnıñ ulı Rafis Borhanov ätiseneñ yulınnan bara. Ul Qazan şähäreneñ iñ zur häm çeterekle Waxitov rayonında xakimiät başlığı. Rayon xalqı da anıñ qayğısın urtaqlaşa. Çärşämbe könne “ İdel -Press” poligrafiä näşriät şirkäte üzeneñ elekke direktorı Vladimir Gavrilovnı mäñgelek yortqa ozatırğa bik küplär kilgän ide. Çığış yasawçılar arasında şirkätneñ elekke direktorı küp yıllar bergä eşlägän Dilbär Xäyrullina da bar ide. Şulay, Başqortstannan, Ukrainadan häm başqa töbäklärdän qayğı urtaqlaşqan süzlär yañğıradı. “İdel-Press”poligrafiä näşriät şirkäteneñ xäzerge direktorı İslam Äxmätcanov anıñ turında: “Poligrafiä- ul üzeneñ yazılmağan qanunnarı belän , üzeneñ päyğämbärläre bulğan ber keçkenä däwlät Şundıy päyğämbärlärdäy bulğan şäxeslärneñ berse ide ul Vladimir Aleksandroviç,- dide ul.
Mälikä Basır, Qazan
