Accessibility links

якшәмбе, 11 декабрь 2016, Казан вакыты 16:50

"Urta Ural tawışları" gastrollärdä yörep qayttı


Ural töbäge talantlarğa bik bay. Uzğan yıl Ural cirendä yäşäp icat itüçe sälätle tatar cırçılarınıñ “Urta Ural tawışları” dip atalğan berençe audiocıyıntığı da çığarılğan ide. Küptän tügel şul uq isemne yörtkän törkem Ural aryağınıñ häm tönyaq Uralnıñ bik yıraq poçmaqlarına barıp, gastrol''lärgä yörep qayttı.

Kurgan ölkäsendäge tatar häm başqort awılları tamaşaçıları Sverdlov ölkäse cırçıların bik yaratıp qarşı aldılar. Mondıy konsertlarnıñ bulğanı yuq ide äle diyuçelär küp buldı. Ä menä Älmän rayonındağı Kazennıy digän ğäcäp isemne yörtkän başqort awılı tamaşaçısına ayırım tuqtalıp ütäse kilä. Konsertqa kilüçe 10-15 yäşlek bala-çağalarnıñ üz moñın, üz köyen ber dä işetkännäre yuq ikän. Zaldağı äbi-apalar yäşlärneñ tuğan telne belmäwlärenä, tuğan mädäniätneñ betä baruına bik poşınıp söylädelär.

Konsertnı çın küñeldän qarap, küz yäşlären sörtä-sörtä räxmätlär uqıp qaldı Kazennıy xalqı.

Kurgan yaqlarına yörep qaytqannan soñ, gastrol''lär Uralnıñ yıraq tönyağında däwam itte. Severoural''ski şähärendä uzdırılğan konserttan soñ, bez tağın tamaşaçılar belän söyläşep aldıq.

Şunısı qızıq, zalda utıruçılar arasında tatar häm başqort xalqı ğına tügel, rus keşeläre dä bulğan ikän. Şularnıñ berse xätta bu törkemneñ daimi qarawçısı buluın, milli moñnarnıñ neçkälegen añlaw öçen tel belüneñ mäcbüri tügellegen äytep aldı.

Ä inde Severoural''ski şähäre tatarlarınıñ milli häm dini tormışın kütärüdä böten küñelen birep eşläp yörüçe Nail'' ağa Gazizov mondıy konsertlarnıñ yäş buınnı milli ruxta tärbiläwdäge ähämiätenä basım yasadı.

Älege konsertlar barısı da xalıq öçen buşlay oyıştırıldı. Çığımnarnıñ barısın da eşmäkärlär kütärde.

Fäwiä Safiullina, Yekaterinburg

XS
SM
MD
LG