Accessibility links

Кайнар хәбәр

Rafael Xäkimov: "Bügenge köndä Putinğa möräcäğät itärgä säbäp yuq"


Mäğlümat çığanaqları, Tömän ölkäse gubernatorı Sergey Sobyanin eşennän kitärgä teläk belderep ğariza yazğanlığın xäbär ittelär. Ul, xäzer töbäk citäkçelären bilgeläw turında Rusiä qanunı ğämälgä kergäç, üzeneñ nämzäte Rusiä prezidentı tarafınnan yaqlaw tabaçaq häm Tömän ölkä dumasına yañadan gubernator bularaq täqdim iteläçäk dip sanıy. İsegezgä töşeräbez, töbäk citäkçelären bilgeläp quyu turındağı Rusiä qanunına Vladimir Putin 12 dekaberdä imza saldı häm älege qanun çärşämbe könne gäzitlärdä basılıp ta çıqtı. Dimäk, qanun ğämälgä kerde. İnde, berençe gubernator eşennän üz teläge belän kitep, yañadan Putin tarafınnan bilgelänäçäkkä ömet itep ğariza da yazdı. Tatarstan räsmilären mondıy xäl nindi uylarğa saldı soñ? “Azatlıq” radiosına Tatarstan prezidentınıñ säyäsät buyınça kiñäşçese Rafael Xäkimov bolay dip belderde.

R.X. Ul anıñ eşe inde. Härber gubernator üzençä tota, üz säyäsäte inde, üz mänfäğätläre. Bezgä turıdan-turı bu qağılmıy inde. Bez berençe bulıp çapmabız.

R.C. Berençe bulıp çapmabız didegez. Mäskäw Kremlennän dä şundıy täqdimnär yuqmı...

R.X. Yuq. Min uylıym, bulmas ta dip. Bügenge köndä bernindi dä säbäp yuq, tege Sobyanin kebek, barıp, Putinğa şundıy möräcäğät belän... Annan soñ, äle bezneñ bügenge köndä söyläşülär dä bar. Şartnamä buyınça söz bara. Bezneñ ike delegatsiä eşli. 1 martqa qädär bez ber Şartnamäneñ proyektın birergä tieşbez. Bälki küp kenä mä’sälälär şunda xäl iteler dip uylıym.

R.C. Sezneñ farazlar: gubernatorlar massovıy töstä otstavkağa birä başlarlarmı yäki...

R.X. Başlarlar dip uylıym. Nu monda nindi gubernator bit. Qayberläre, menä mäsälän kommunistlarnı Putin turıdan turı äytte, alar kiräkmi dip. Alarnıñ belmim niçek xäzer bulır. Qayberläre inde şatlanıp yögerer. Qayberläre kötär. Läkin Lujkovnıñ, mäsälän, berençe bulıp anda çabuına säbäp yuq. Kiresençä, ul soñğı momentqa qädär kötär dip uylıym.

Räfis Cämdixan

XS
SM
MD
LG