Accessibility links

шимбә, 3 декабрь 2016, Казан вакыты 01:30

Tatarstanda 2005 yıl Qazannıñ 1000 yıllığına bağışlana


Dönya buylap 2005 yıl könçığış traditsiäsenä nigezlänep ätäç yılı bula, dip bäyräm itsälär. Tatarstanda xällär bötenläy başqaça. Tatarstan Prezidentı färmanı belän kiläse yıl Qazannıñ 1000 yıllığına bağışlana. Färman gäzitlärdä basılıp çıqtı, dimäk ğämälgä dä kerde. Räsmi käğäzdä äytelgänçä, färman, Rusiä häm Tatarstan däwlätçelegeneñ barlıqqa kilüendä Qazannıñ tarixi ähämiäten bilgeläw, tarixi häykällärne saqlaw, oyışma häm şirkätlärne yubileynı bäyräm itügä cälep itü yözennän çığarıldı, dielä. Anıñ nigezendä, Tatarstan xökümätenä, şähär idäräsenä, rayon idärälärenä Qazannıñ sotsial-iqtisadi üseşe öçen eş alıp barırğa quşıla. İctimaği oyışmalarğa, cirle üz idärälärgä, icat berleklärenä, Qazannıñ yubiley yılın bilgeläp ütüdä qatnaşırğa täqdim itelä. «Tatmedia» agentlığına, mäğlümat çaralarına Tatarstannıñ küp millätle xalqı tudırğan ruxi, mädäni qimmätlärne cämäğätçelekkä tanıtu eşen aktivlaştırırğa, borınğı mirasqa saqçıl qaraşnı forumlaştırırğa, başqalanıñ tarixi ütkänenä ixtiram belän qaraw toyğısın nığıtu maqsatı quyıla.

İnde bu Prezident färmanı niçek ütäläçäk, digän soraw belän törle oyışmalarğa şaltırata başladıq. Qazan şähär idäräsendä Qazannıñ 1000 yıllığına äzerlänü belän şöğellänüçe maxsus bülek bar. Anıñ xezmätkärläre äytkänçä, bu färman belän alar tanış, ämma añlatmalar birä almıylar. Alayda oyışma, şirkätlärne yubileynı uzdıruğa cälep itü belän İqtisat Ministrlığı, Qazan şähäreneñ iqtisat komitetı şöğellänäçäk, dip äyttelär. Zur şirkätlärne cälep itü eşe belän Saban tuyları, Respublika könen uzdırğanda şöğellänälär ide inde, bu yulı cälep itü niçek barır bilgele tügel.

Prezident färmanınıñ 2nçe matdäsendä Qazannıñ sotsial-iqitisadıy üseşe turında süz bara. Belgänegezçä, Tatarstannıñ sotsial-qtisadıy üseşe turındağı komplekslı federal programma bar, Qazannıñ 1000 yıllığına bağışlanğan çaralar isemlege anda töp urınnı alıp tora. Älege programmanı ütäw belän küp sanlı ministrlıq häm başqa törle oyışmalar şöğellänä.

Ğomum alğanda respublika buylap här oyışma Qazannıñ 1000llığına bağışlanğan çaralarnı eş plannarına kertkän. Yul tözüçelär xäräkätne cayğa salu belän şöğellänä, militsiä, iminlek mäs’älälären qayğırta, tözüçelär zamança binalar qora, iskelären yañarta, mäğlümat çaraları Qazannıñ 1000 yıllığına äzerlek barışı turında daimi yazıp tora. Şuña kürä, Tatarstan Prezidentınıñ bu ukazı däwlät oyışmalarınıñ, ictimaği berläşmälärneñ eşenä ällä ni zur üzgäreşlär alıp kilmäyäçäk. Ämma ber yañalıq bar. Qazannıñ 1000 yıllığı avgust axırında ğına tügel, 2005 yıl äylänäsendä bilgeläp üteläçäk.

Bikä Timerova

XS
SM
MD
LG