Accessibility links

якшәмбе, 11 декабрь 2016, Казан вакыты 15:00

Tatarstan Prezidentı stipendiatlar belän oçraştı


Tatatarstan Prezidentınıñ stipendiatlarnı qotlaw ğädäte respublikada inde 5 yıl bara. 2004 yılnıñ 9 ayı buyınça däwlät stipendiäsenä layıq dip 60 keşe tanılğan. Alarnıñ 20 aspirant, 30 student, 10 uçilişçe-texnikumnarda belem aluçı uquçılar. Stipendiäneñ külämenä kilgändä, ul aspirantlarğa 9 meñ, studentlarğa 7 meñ 200, texnikum-uçilişçe uquçılarına 3 meñ 600 sum.

Pänceşämbe könne TR prezidentı belän uzğan oçraşuda 60 stipendiatnıñ 58 qatnaştı, 2 se xäzerge waqıtta çit ildä ikän. “Yarıy äle 2 se monda bulıp, 58 çit ildä tügellege şatlandıra,” - dide oçraşu başında Mintimer Şäymiev.

Soñğı yıllarda fän belän şöğellängän yäşlärneñ çit ilgä kitüläre yışaydı. Monı yäşlär aqça bulmaw säbäple üz proyektların tormışqa aşıra almawı, xezmät xaqınıñ tübän buluı, toraq mäs’äläläre xäl itelmäwe belän añlata. Bügen oçraşuda da älege mäs’älälärgä tuqtalıp uzdılar. Mintimer Şäymiev isä yäşlärgä däwlät tarafınnan yärdäm bulaçaq dip ışandırdı. Küptän tügel açılğan “İdeya” texnoparkı yäşlärneñ innovasion ideyälären tormışqa aşıruğa yärdäm itäçägen belderde. İnde bügenge köndä “İdeya”ğa 370 eş qabul itelgänen äytte. Toraq mäs’äläsenä tuqtalıp 2004 yılnıñ 1 ğinwarınnan sotsial' ipoteka eşli başlawın bilgeläp uzdı, ä balası tuğannarğa 18 kvadrat metr mäydan buşqa bireläçägen assızıqladı.

Tatarstan prezidentı üz çığışında innovasion texnologiälär, fänneñ üseşe turında fikerlären citkerde. Yaña cämğiät tözelgän çorda barı belem yärdämendä genä alğa kitep bulaçağın assızıqladı.

Yana ezlänülär bara. Bezneñ artta qalırğa xaqıbız yuq, çönki belemle keşelär küp.

Bügen cıyılğan stipendiatlarnıñ kübese törle Xalıqara, Rusiä konferensiälärdä qatnaşıp kilälär, fänni mäqälälär yazalar, aralarında törle tikşerenülär alıp baruçılar da citärlek. Mintimer Şäymiev oçraşuda alarnıñ qayberlären ayırım bilgeläp uzdı. Timur Deberdeev belän Mixail Ogorodov eşläre qızıqsınu uyatqanın äytte.

Oçraşuda şulay uq aspirantlar, studentlar üzläre dä çığış yasadılar, Mintimer Şäymievkä sorawlar birdelär, täqdimnären citkerdelär.

Energetiqa texnikumında uquçı Artur Şords törle citeşterü şirqat'lärendä ğämäli däreslärne uzdıruğa iğtibar birergä kiräklegen assızıqladı. Citeşterüdä eş küp bulu säbäple, däreslär öçen waqıt az qaluın äytte. Alabuğa däwlät pedagogika universitetı aspirantı Sergey Sedov belem birü sıyfatın yaxşırtu mä’säläsen kütärde. Mintimer Şäymiev tüläwle belem birüneñ artuın assızıqladı. Ämma bu mä’säläne qararğa kiräklegen äytte. Çönki böten keşeneñ dä balasın tüläp uqıtırğa mömkinlege bulmawın häm monı istä totarğa kiräklegen bäyän itte.

Orenburg qızı Liliäne Noğmanovanıñ çığışı ayıruça iğtibarğa layıq buldı. Liliäne Orenburgta tanılğan jurnalist Färit Noğmanovnıñ qızı. Ul uzğan yıl finans-iqtisad institutın tämamlağan häm anı Qazan däwlät texnik universitetına aspiranturağa çaqırğannar. Ber yıl ğına uquına qaramastan, tizdän inde ul dissertatsiäsen yaqlarğa cıyına.

Oçraşuda azağında Mintimer Şäymiev barlıq stipendiatlarğa, rektorlarğa räxmät belderde häm kiläçäk eşlärendä uñışlar teläde.

Landış Xarrasova

XS
SM
MD
LG