Accessibility links

җомга, 9 декабрь 2016, Казан вакыты 20:34

Törek premyer-ministrı: alda tağın da qatlawlıraq eş tora


Räcäp Tayip Erdoğan Brüsseldän İstanbulğa ciñüçe bularaq qayttı - Yevropa Berlegendäge 25 ilneñ citäkçese comğa könne Törkiäne dä şuşı Berlekkä alu söyläşülären kiläse yılda başlap cibärü turında qarar qabul itte. Şimbä irtän Erdoğannı İstanbul hawa alanında 2 meñläp keşe törek wä Yevropa Berlege bayraqların bolğap qarşı aldı.

Törek premyerı alarğa, iñ awır eş äle başlana ğına dip belderde.

Audio, Räcäp Erdoğan

"Bu näticä bezne tınıçlandırırğa tieş tügel, xäzer bezgä tağın da tırışıbraq eşlärgä kiräk häm bez kübräk eşliäçäkbez dä. Läkin monı xökümät üze genä eşlämäyäçäk, bez monı barıbız da bergäläşep alıp baraçaqbız" di Törkiä premyer-ministrı ilneñ Yevropa Berlegenä quşılu omtılışın ğämälgä quyu xaqında. Comğa könne Brüsseldä uzğan söyläşülär çaq qına özelmi qaldı, yaqlar Kipr mäs''äläsendä hiç kileşä almadı. Küptän tügel genä Yevropa Berlegenä kergän älege utraw haman da ikegä bülengän kileş yäşi, anıñ töreklär yäşägän tönyağında Törkiä ğäskärläre urnaştırılğan, könyağında isä greklar ğömer kiçerä. Yevropa Berlegenä utrawnıñ näq menä grek öleşe kerde, xäzer inde Brüssel'' Änkaradan Kiprnı tulısınşa üz tamojnä berlegenä kertü turındağı bereketmägä qul quyuın telägän ide. Ämma Erdoğan moñardan baş tarttı, çönki bu bar Kiprda barı tik grek yağı xökümäte wäkalätlären genä tanunı añlatır ide dip belderde. Säğätlär buyı barğan söyläşülärdän soñ yaqlar, berketmäneñ imzalanaçağı, ämma monıñ soñraq eşlänäçäge belän kileşte. Törek xökümäteneñ Brüsseldäge uñışı Törkiäneñ kiläçäktä üzennän-üze Yevropa Berlege äğzasına äylänäçägen äle añlatmıy, ilne ikeyaqlı söyläşülär, Yevropa Berlege standartlarına küçü, iqtisadi, ictimaği wä säyäsi üzgäreşlär kertü kötä häm bu un yılğa yaqın baraçaq dip farazlana. Törkiäne äğza itep aluğa Berlektäge berniçä il haman da kisken qarşı çığa, alarda bu töreklärneñ Yevropağa küpläp küçep kilüenä, möselmannarnıñ nigezdä xristian Yevropağa nığraq ütep kerüenä kiteräçäk digän qurqular bar. Läkin ägär dä Törkiä qayçan da bulsa Yevropa Berlegenä kersä, bu andağı berençe möselman däwläte bulaçaq häm Yevropanıñ säyäsi çiklären Ğiraq, İran, Süriä kebek illärgä qädär küçeräçäk.

Kärim Kamal
XS
SM
MD
LG