Accessibility links

Кайнар хәбәр

Pakstan oppozitsiäse prezident Möşärräfneñ qorallı köçlär başında qalu telägenä qarşı çaralar wäğdä itä


Pakstan prezidentı Pärwäz Möşärräfneñ comğa könne, kiläçäktä dä däwlät başlığı buludan tış äle ilneñ qorallı köçläre başında da qalırğa cıyınuı xaqında belderüe Pakstan oppozitsiäseneñ nıq açuın çığardı. Bıltır ğına Möşärräf, üz prezidentlığınıñ qanuni nigezen nığıtu maqsatında 2004-nçe yıl azağına qädär xäzerge xärbi postınnan waz kiçäçägen wäğdä itkän ide.

Pakstan parlamentındağı oppozitsiä, bigräk tä andağı islamçılar, prezidentnıñ qorallı köçlär başında qalırğa cıyınu niätenä xälennän kilgänçä qarşı çığaçağın belderä. Alarnıñ "Möttähidä Mäcles-ä-ğämäl" partiäse citäkçese qazıy Xösäyen Äxmät yäkşämbedä, islamçılar şuşı könnän başlap başqala İslamabad yanındağı Rawalpindi şähäre uramnarında xökümätkä qarşı cıyınnar ütkärä başlıy dip äytte. Möşärräfkä qarşı şundıy ike çara uzğan atnada inde ütkärelgän ide. Prezidentnıñ comğa kiçen üze iğlan itkän qararı ildä çınnan da säyäsi kierenkelek tudırdı. Anda ul qorallı köçlär başlığı bulıp 31-nçe dikäberdän soñ da qalaçağın äytte.

Audio, Pärwäz Möşärräf

"Äye, min 31-ennän soñ da xärbi kiemdä qalaçaqmın. Min monı sezgä berençe märtäbä äytäm, berniçä könnän soñ min xalıqqa möräcäğät belän çığaçaqmın häm anda şuşı ğämälemneñ säbäplären añlataçaqmın. Annarı bez üzebezneñ bügen qayda buluıbız, eşne qaydan başlawıbız, närsägä ireşüebez häm qaya yul totuıwıbız turında söyläşerbez" dip beldergän ide Pakstan prezidentı Pärwäz Möşärräf üzeneñ kiläçäktä dä ilneñ qorallı köçläre başında qaluı turında. Şuşı ike urınnı ul 1999-nçı yıldan alıp, qansız ğına ütkärelgän xärbi fetnädän birle totıp kilä. Bıltır Möşärräf islamçı partiälärgä, ägär dä alar parlamentta prezident wäkalätlären arttrıunı yaqlasa, şuşı yıl azağına qädär xärbi postınnan kitüne wäğdä itkän ide. Ämma uzğan ayda, parlamenttağı Möşärräf yaqlı küpçelek aña ike urınnı da üz qulında saqlap qaluğa yul açqan üzgäreşlär qabul itte. Elegräk prezident, anıñ xärbi citäkçelektän waz kiçüe Pakstannıñ terrorğa qarşı alıp barğan köräşenä häm kürşe Hindstan belän solıx tözü tırışlıqlarına zian kiterä ala digän fiker beldergän ide. Ul şulay uq, Pakstan xalqınıñ küpçelege anıñ ildä zur säyäsi qüwätkä iä qorallı köçlärneñ başında qaluın teli dip tä äytte. Möşärräfneñ beryulı ike möhim postnı biläwen häm bigräk tä anıñ xakimiatkä fetnä näticäsendä kilüen Könbatış ta tänqitläp kilgän ide, ämma 11-nçe sintäbr waqiğälärennän soñ anıñ terrorğa qarşı köräştä Quşma Ştatlar yağın aluı belän bu tänqit çağıştırmaça sürelde. Pärwäz Möşärräfneñ amerikannar belän xezmättäşlege, aña kimendä öç märtäbä höcüm yasawğa kiterde. Pakstan iminlek köçläre, alar ildäge radikal'' islamçılar tarafınnan yasaldı dip belderä. Britannardan bäysezlek alğannan birle 57 yıllıq tarixınıñ yartısın Pakstan xärbilär xakimiate astında ütkärde.

Kärim Kamal
XS
SM
MD
LG