Accessibility links

якшәмбе, 4 декабрь 2016, Казан вакыты 03:04

Beslandağı terrorçılar arasında tatar keşese bulmağan


20 dekaberdä Rusiädä bilgeläp ütelä torğan Federal’ İminlek xezmäte köne bıyıl ayıruça da iğtibar üzägendä buldı. Tatarstanda da älege könne bäyräm ittelär. Respublikanıñ premyer-ministrı Röstäm Miñnexanov İminlek xezmäte wäkillären räsmi räweştä qotladı, alarğa uñışlar teläde. Düşämbe kiçendä isä Kärim Tinçurin isemendäge teatr binasında Federal’ İminlek xezmäteneñ Tatarstandağı xezmätkärläre tantanalı kiçägä cıyıldı. Äytergä kiräk, maxsus xezmätlär, iminlek saqlaw oyışmaları berwaqıtta da tatar xalqı tormışınnan çittä bulmadı. Tatar-başqortlarnıñ da Rusiä küzläw xezmätlärenä kertkän öleşe şaqtıy. Rixard Zorge belän çağıştırıla torğan, ikençe dönya suğışı yıllarında Yaponiä belän Amerika arasında kisken bäreleş - Perl-Xarbor faciğäsenä kiterep çığarğan tatar keşese - xäzerge Çiläbe ölkäseneñ Troitsk şähärendä tuğan İsxaq Axmerovnı ğına iskä alıyq. Qıtayda häm Yaponiädä tatar möhacirläre belän aralaşıp, sovetlarğa eşläwe açıqlanğan Şamil' Xämzin, anıñ xatını İrina Alimovalar da xäzer küplärgä bilgele. NKVD, GPU, KGB sistemasında eşlägän, repressiä eşlärendä qatnaşqan häm şul uq repressiädän qorban bulğan keşelär arasında da tatarlar az tügel.

Xäzerge çorda federal' iminlek xezmäte yaña, köçle däwlät qoru eşendä qatnaşa. Çağıştırmaça yäşli layıqlı yalğa çıqqan iminlek xezmäte ofitserları Vladimir Putin yäki bilgele iqtisat generalları kebek karyera yasamasa da, sivil' tormış qağidälärenä yaraqlaşırğa tırışalar.

Azatlıq radiosınıñ Qazan byurosı isä 20 dekaber - Federal' İminlek xezmäteneñ hönäri bäyräme könne İminlek xezmäteneñ Tatarstan buyınça idäräsenä möräcäğät itte. Xäyer, bezneñ möräcäğät alarnı bäyrämnäre belän qotlaw niätennän genä eşlänmäde. Kommersant Vlast' jurnalınıñ 20 dekaberdä çıqqan 50 sanında Räsül Soltanovnıñ xatı basılğan. Ul anda Beslandağı terrorçılar arasında Aqtanıştan çıqqan tatar keşese bar ide, dip yazğan. Bez Räsül Soltanov isemennän yazılğan bu xattağı älege faktnı raslawnı yäki inqär itüne sorap, FSBnıñ Tatarstan idäräsenä möräcäğät itkäç, cawap bik tiz kilde. Alar süzlärenä qarağanda, bu fakt Rusiä prokuraturası belderülärennän soñ uq tikşerelgän. Beslan terrorçılar arasında Aqtanıştan da, başqa urınnardan da çıqqan tatar keşese bulmağan. Şulay itep, ışanıçlı çığanaqlar raslawınça, Beslandağı tatar terrorçısı digän süzlär döreslekkä turı kilmi.

Gölnaz İlgizär

XS
SM
MD
LG