Soñğı könnärdä Qazannıñ häm başqa Tatarstan şähärläreneñ çikläre, cirle üzidarä wäkälätläre iñ qaynar mäs’älälärgä äylände. Düşämbe könne Däwlät Sovetınıñ däwlät tözeleşe häm cirle üzidarä komitetı utırışı buldı. Bu utırışta Yäşel Üzän, Biyektaw, Piträç rayonnarınıñ qayber awılları Qazanğa kerü mömkinlege mäs’äläse dä qaraldı. Monıñ öçen şul yäşäw urınnarında kiläse yıl başında referendum ütärgä tieş. Däwlät Sovetı munitsipal' berdämleklärneñ çiklären bilgeläw turındağı qanun proyektları şuşı referendumnar ütkännän soñ ğına ikençe uqılışta qaralaçaq.
Moña qädär Qazan tiräsendäge awıllarnıñ cirle üzidaräläre yuqqa çığarılıp, andağı xezmätkärlärne qısqartu turında qarar qabul itelgän ide. Bu ğämäl ni öçen eşlänä disägez, Dönya bankı Qazannıñ meñyıllığına äzerlek qısalarında 125 million dollar kredit birüe öçen şähärneñ munitsipal' tözeleş dönya küläm häm Yevropa standartlarına turı kilergä tieş, dip añlatıldı. Ämma, Rusiädäge häm Qazan tiräsendäge tormış xäzergä Yevropa standartlarınnan yıraq. Anda Şveytsariädäge kebek cämäğätçelek tarafınnan idärä itelüçe awıl häm qalalar küz aldına da kilmi. Ämma, prokuratura bu qararğa qarşı protest kertte. Näticädä bernindi idäräsez, buxgalteriäsez qalğan awıldağı yäşäwçelärneñ Qazanğa barıp, şähär rayonnarındağı xakimiättä çiratta tora qurqınıçı xäzergä çigende. Cirle üzidarälärneñ wäkälätläre dä 2006 yılnıñ 1 ğinwarına qädär ozaytıldı, awıllardağı idärä orğannarı da xäzergä saqlana.
Qazan şähäre üzeneñ xoquqların bilgeläp, Ustav, gerb raslaw maqsatınnan baş tartmıy. Çärşämbe könne şähär sovetınıñ 21 sessiäse şuşı mäs’älälärne tikşerergä cıyına. Ä comğa könne Şähär sovetınıñ tağın ber sessiäse üz eşen başlarğa tieş.
Rimzil Wäli
