Accessibility links

Кайнар хәбәр

Bosniä serbları ilneñ tarqalu ixtimalı belän yanıy


Banja Luka. Bosniä serbları respublikasınıñ prezidentı Dragan Caviç xalıqara cämäğätçelekne, ägär dä Bosniä serblarınıñ Republika Srpska respublikasın yuq itü tırışlıqları däwam itsä, bu andağı serblarnı Bosniädän ayırılıp, bäysez däwlät qoruğa etärä ala dip kisätä. Kiçä bäyän itelgän belderüendä Caviç, Bosniäneñ bötenlege nigezendä, Dayton solıx kileşüendä ireşelgän prinsip, ilneñ ike öleştän toruı yata, monı üzgärtü omtılışları krizis tudıraçaq häm axırğı çiktä bu Bosniäneñ tarqaluına kiteräçäk dip belderä. Dayton kileşüe Bosniädä 3 yıl barğan qanlı suğışnı tuqtatıp, anda tınıç tormış çorın başlap cibärgän ide. Caviçneñ belderüe, Bosniädäge xalıqara idaräçese Paddy Ashdownnıñ Republika Srpska kiläçäge turında äytkän süzlärenä cawap bularaq yasaldı. Ber basmanıñ, ägär dä serblar kiläçäktä dä Haagtağı xalıqara mäxkämä belän xezmättäşlek itüdän baş tartıp kilsä, Republika Srpska yuqqa çığarıla alamı digän sorawğa Ashdown, min ber genä ixtimalnı da kire qağa almıym, bar närsä dä mömkin digän ide. Şuşı mäs'älä tiräsendäge ğawğa uñayınnan bügen Bosniä serbları xökümätendäge yustitsiä ministrı Slobodan Kovaç üz urınınnan kitüen belderde, atna azağında näq şunı uq premyer-ministr häm tışqı eşlär ministrı da eşlägän ide.
XS
SM
MD
LG