Mäskäw. Quşma Ştatlarda urnaşqan häm bar dönya buylap keşe xoquqları ütäleşen küzätep barğan "Freedom House" oyışması, Rusiä bıyıl "irekle bulmağan, ireksez" illär rätenä töşte dip belderä. Şul oyışmanıñ başqarma mödire Jenifer Windsor süzlärenä qarağanda, prezident Putin xakimiatendä "säyäsi qüwätne üzäkläşterü, mäğlümat çaraların cäberläw, ilneñ xoquq saqlaw sistemasın säyäsätläşterü" omtılışları arta bara. Windsor, şuşı omtılışlar Rusiäneñ avtoritar xakimiat çorına qaytu qurqınıçın arttıra dip isäpli. Başqa sovet respublikaları arasında demokratik qazanışlar ölkäsendä çigenülär Belarus, Litva häm Ärmänstanda küzätelgän. Törkmänstan isä Kuba, Tönyaq Koreä, Sudan, Söğüd Ğäräbstanı häm Süriä belän bergä iñ zalim illär rätenä kerä. "Freedom House" bıyıl barlığı 192 ilne tikşergän, şularnıñ 46 protsentı "irekle", 26-se "ireksez", qalğannarı "öleşçä ireksez" dip bäyälängän.
