Accessibility links

“Duslıq yortı” çaraları tatarğa närsä birä


Omski ölkäsendä eşläp kilüçe milli-mädäni üzäklär häm moxtariätlär belän eşläwçe töbäqära milli mädäni - sport berläşmäse “Seber” yäğni “Duslıq yortı” üzeneñ çirattağı millätara çarasın - törle milli icat kollektivlarınıñ ğomum konsertın ütkärde. Bıyılğı bu çara kollektivlarnıñ xisap konsertı dip ataldı häm “Duslıq yortı” urnaşqan mädäniät sarayında uzdı. Konsertta qatnaşuçılarnıñ sanı 250 keşedän artıq buldı. Tatarlardan anda “Umırzaya” xalıq ansamble belän “Ömet” balalar kollektivı qatnaştı. Üzlärenä birelgän 3 minut waqıtta alar kümäkläp tatar xalıq cırın başqardılar. Şunı äytep ütü urınlı bulır, konsertta ölkännär häm balalar kollektivlarınıñ töp sostavı tulısınça qatnaşsa da, ansambl'gä yörüçelär mondıy çaralarğa bik teläp barmıylar. Küplärneñ fikerençä, bu çaralar formal' räweştä ütkärelälär häm kübräk oyıştıruçılarnıñ eşlären kürsätü öçen kiräk. Ansambl'neñ cırçısı Fağilä Çumarova mäsälän, bez, qatnaşuçılar üzebez dä ruxi qänäğätlek xise toymıybız, tamaşaçılar arasında tatarlar da az bula-di.

Omski ölkä xakimiäte başlığınıñ berençe urınbasarı Viktor Şreyder şähär mäçetlärendä bulıp, möselman ğibädät yortlarınıñ torışı belän tanışıp çıqtı, möselmannar belän oçraştı. Şreyder äfände mäçetlärneñ bügenge köndä nindi yärdämgä moxtac buluların açıqladı. Bezneñ ölkädä xristiannardan soñ küpçelekne täşkil itkän konfessiä wäkilläre - möselmannar, mäçetlärneñ tözeleşenä dä, cılılıq, yaqtılıq öçen tüläwgä dä yärdäm itärgä kiräk, barlıq dinnärgä dä tigez qaraw zarur,-dide. Ayırım alğanda, monnan berniçä yıl elek tözekländerü eşläre başlanıp, xäzer bötenläy diärlek tuqtalıp qalğan Xaci- Äxmät mäçete xacätenä tiz arada yärdäm kürsätergä wäğdä birde. Möselman din ähelläre bu xälne törleçä yuradılar. Räsmi bulmağan xäbärlärgä qarağanda, gubernator urınbasarınıñ 2005-nçe yılnıñ martında bulaçaq şähär başlığı saylawlarında qatnaşu ixtimalı bar.

Rozaliä Sayganova, Omski.

XS
SM
MD
LG