Accessibility links

пәнҗешәмбе, 8 декабрь 2016, Казан вакыты 19:13

Yoşqar Ola belän Çabaqsar Kiev tügel


Mari Respublikası Tatarstanğa terälep tora. İdelneñ ikençe yağında Çuwaşiä, Yäşel Üzän şähärennän soñ berniçä minut barğaç ta Mari Respublikasınıñ Voljski şähärenä kilep çığasıñ. İke respublika, rayonnar häm şähärlär arasındağı yulğa tuzan töşmi. Härwaqıtta xäräkät. Urman taşu, tawarlar qaytaru, uqırğa, eşlärgä baru – barısı da bar. Mari respublikasındağı sotsial''-iqtisadi xäl häm mädäni-ictimaği wäzğıyät Tatarstannıqınnan ayırılıp tora. Eş urınnarı häm aqça citmäw säbäple Mari Elda yäşäwçe tözüçelär, balta ostaları Tatarstanğa eşkä kilälär. Ayırım yortlar häm tuzğan toraq programması obyektların kütärüdä mari eşçe qullarınıñ öleşe zur. Respublikanıñ töp xalqı marilarnıñ tele, mädäniäte şaqtıy awır xäldä. Milli üzençäleklärgä qırın qarıy torğan xäzerge zamanda bu berkemne dä ğäcäpländermi. Şuña kürä marilarnıñ milli mä’säläläre, prezident saylaw bäxäsläre älläni quyırmas dip uylarğa kiräk. Ämma tormışta başqaçaraq ikän. Sişämbe könne Azatlıqnıñ Qazan byurosına Yoşqar-Oladan şaltırattılar. Anda xökümät yortı qarşında mari milli xäräkäte wäkilläre piketqa çıqqan ikän. Bu waqiğağa añlatma birüen sorap, bez Mari Kiñäş oyışması sovetı räise Vladimir Kozlovka möräcäğät ittek.

Şulay itep, eşçän, tırış, küp söyläşmi häm qarışmıy torğan mari xalqı wäkilläre prezident saylawlarınıñ yomğağı belän rizalaşmıy. Alar saylawda yaqlağan Mixail Dolgovnıñ uzğan yäkşämbedä 20 protsent tawış cıyuı zur ciñü bulıp sanala. Bigräk tä Voljski şähärendä, Kujener, Marki rayonnarında anı saylawçılarnıñ yartısınnan kübräge yaqlağan. Döres, administratsiä resursına tayanıp 56 protsent cıyğan Leonid Markelov berençe turda uq ciñep çıqqan. Marilarnıñ küñele moña rizalaşmıy, tınıçlanmıy. Dimäk millätneñ canı, üzeneñ qaraşı häm maqsatları bar. Vladimir Kozlov bu atnada bötenmari kiñäşeneñ qorıltayı ütäçäge turında äytte.

Xäzerge çorda milli faktor, bigräk tä Rusiä üzägendäge azraq sanlı xalıqlarnıñ tä''sire säyäsätkä zur tä''sir yasamıy. Şulay da ul bar. Xakimiät moña qolaq salmıyça, tınıç qına yäşi almas dip sanıy etnosäyäsät belgeçläre.

Rimzil Wäli

XS
SM
MD
LG