Accessibility links

якшәмбе, 4 декабрь 2016, Казан вакыты 21:34

22 dekaber – Tatarstan energetikları köne


Çärşämbe gäzitläre, bu tarmaqnıñ eşçänlegenä bağışlanğan yazmalarnı bastırıp çığardı.Tatarstannıñ baş energetigı «Tatenergo» oyışmasınıñ citäkçese İlşat Färdiev xezmättäşlären möräcäğät belän çığıp qotladı. Räsmi cotlaw tekstında, tarmaq eşçänlege turında küpmeder mäğlümat ta bar. Soñğı waqıtta, «Tatenergo» oyışması millionlağan burıçlardan qotılıp, uñışlı eşli başlağan. Qotlawda şundıy yullar bar: «İnde menä batırıp äytä alabız: elektr energiäsen qullanu kimü, bölgenlekkä çığu qurqınıçı, xronik aqçasızlıq, qullanuçılar belän barter aşa ğına isäp-xisap yasaw kebek borçular urtaq tırışlıq näticäsendä artta qaldı» dielä. Ütep bara torğan yılda stansiälär yaña cihazlar belän yañartu öçen, cılılıq häm elektr çeltäreneñ ışanıçlığın arttıru öçen zur külämle investitsiälär cälep itelgän. 2004 yılda «Tatenergo» Energiäne saqlaw häm energiä-cılılıq citeşterü häm bülüdä aldınğı texnologiälärne üzläşterügä yöz totıp eşläde, dielä İlşat Färdiev qotlawında. «2005 yılnıñ ğınvarınnan, «Tatenergo» Rossiäneñ kisken köndäşlek cäyelgän energiä bazarında eşli başlayaçaq» dielä qotlawda. Kommunal tüläw Tatarstan energetikları üz çığımnarın qısqartırğa uylıy, ämma tariflarnı da üsterergä turı kiler, dielä räsmi möräcäğättä.

Energetiklar, Qazannıñ 1000 yıllığına äzerlänü çaralarında da qatnaşa. Şähärneñ tarixi öleşendäge torbalarnı alıştıru öçen, energetiklar Skandinaviä texnoligälären qullanğan ikän. Yaña cılılıq ütkärgeçlär, çeremi torğan penopoliuretan häm polietilen digän çimalınnan eşlängän. Alarnı Daniädän qaytartqannar. Yaña ütkärgeçlärne salu öçen energetiklarğa bik awır turı kilä, çönki Qazannıñ cir astında torbalar, elektr çıbıqları şul xätle küp ki, enä törterlek urın yuq ikän. Şuña energetiklarğa gorizontal borawlaw ısulın üzläşterergä turı kilä. Şähärdä qazu eşlärne alıp baru tarixi qatlamnarğa zıyan salu belän dä bäyle, şuña bu eş totqarlana. Energetika tarmağında eşläwçelär torbalar alıştıru eşen kiläse yılnıñ iyülenä qädär tämamlarğa cıyna. Ä 22 dekaberdä energetika tarmağında eşläwçelär bäyräm itä. «Tatenergo» oyışmasında tantanalı utırış häm konsert buldı.

Bikä Timerova.

XS
SM
MD
LG