Accessibility links

якшәмбе, 4 декабрь 2016, Казан вакыты 13:12

Optimizasiä kemgä fayda kiterer?


2005-2007 yıllarğa isäplängän programmanı qarağan utırışta Tatarstan respublikası deputatları Razil Wäliev, Tufan Miñnullin, İndus Tahirov, Rinat Zakirov, Mäğärif ministrı Räis Şäyxlislamov häm başqa citäkçelär qatnaştı.

Razil Wäliev älege programmanıñ küptän tügel Xökümät däräcäsendä qaralıp uzğanın assızıqladı. Anda rayon başlıqları da qatnaşqan. Ämma programmanıñ äle tulısınça äzer bulmawı bilgelängän uzğan utırışta. “Häm bügen şularğa açıqlıq kertü kiräk”, - dide Razil Wäliev.

Bügenge utırış küp kenä bäxäslärdän tordı.

Räis Şäyxlislamov awıllarda berniçä fänne ber ük uqıtuçı uqıtu arqasında, häm bilgele inde uquçılarğa kiräkle belemne birep betermäw säbäple, balalarğa berdäm däwlät imtixanın tapşıru awır bulaçağın assızıqladı. Älege programmanı eşlägändä härber rayon mäğärif bülekläreneñ täqdime isäpkä alınğanın äytte.

Utırışta cıyıluçılar isä programmadağı härber neçkälekne uylarğa kiräklegen bilgeläp uzdılar. Ayıruça optimizasiä näticäsendä ikençe awılğa barıp uqırğa tieş bulğan uquçılarnı transport belän tä'min itü mä’säläse zur bäxäs uyattı. Bilgele bulğança küp kenä awıllarda yullar yuq. Häm yazın-közen yañğırlarda anda maşinalar ütep kerä almıy. “Yulnı tözekländermi torıp uquçılarnı ikençe awılğa yörtergä yaramıy”, - dide Bötendönya tatar kongressı Başqarma komitetı räise Rinat Zakirov. “Yulı tözek bulsa da ber kön maşinası cimerek, ikençe könne benzinı bulmasqa mömkin. Şunnan uquçılar mäktäpkä bara almıy qala”, - didelär utırışta.Tufan Miñnullin üze tuıp üskän Qama Tamağı rayonı xäle misalında añlattı

Barısın da ber mäktäpkä kiterep tutıraçaqlar. Mäktäp iske, yul yuq. Häm bulırğa da cıyınmıy. Şunnan şaw-şu kitäçäk. Ministrğa xatlar kiläçäk. Bolay eşlänergä tieş tügel.

Şulay uq utırışta awılda bolay da eş yuq, ul mäktäplär yabılsa uqıtuçılar qayda baraçaq digän soraw quyıldı. Çönki optimizasiä näticäsendä 722 uqıtuçı qısqartılaçaq. “Uqıtuçılarnı eşkä urnaştıru buyınça maxsus programma eşlänä”, - dide Räis Şäyxelislamov.

Monnan tış tarixi awıllardağı mäktäplär turında süz bardı. Mäsälän Arça raynı Quşlawıç awılı mäktäbe. Älege urta mäktäpne başlanğıç mäktäp itep qaldırmaqçı bulalar. “Ul Tuqay belän bäyle awıl, ul bit tarix. Alarnı niçek bar şulay qaldırırğa kiräk”, - didelär. Çönki andıy tarixi mäktäplär küp tügel.

Utırışta kinät räweştä kenä optimizasiägä küçü mömkin tügel, öleşläp küçärgä kiräk, başta ike mäktäptä genä eksperiment uzdırırğa kiräklege äytelde. Räis Şäyxelislamov: “Rayonnarda inde eksperiment bara”, - dide.

Razil Wäliev: “Awıl – ul xalqıbıznıñ yazmışı. Millät turında uylıybız ikän bu mäs’älägä çeterekle qararğa, kiräk”, - dide. Härber äyberne ülçäp eşläw zarurlığın äytte.

Şulay itep programmada xäl itelmägän mäs'älälär şaqtıy. Bilgele anda qaysı awılğa nindi avtobus kiräk bulaçağı, küpme aqça totalaçağı barısı da bäynä-bäynä yazılğan. Ämma programmada yazılğança barısı da eşläner dip kem wäğdä itä ala.

Landış Xarrasova

XS
SM
MD
LG