Accessibility links

якшәмбе, 11 декабрь 2016, Казан вакыты 01:22

Yaña Ğasır tağın ber radioyışlıqqa iä buldı


Çärşämbe könne Mäskäwdä Matbuğat häm mäğlümat çaraları buyınça federal' agentlıqnıñ konkurs komissiäse radiotapşırular alıp baru öçen yışlıqlar bülü bäygesen ütkärde. 107.8 yışlığındağı radiodulqınğa däğwälawçılar arasında Tatarstanda eşläwçe radiostansiälär dä bulıp, şularnıñ berse bäygedä ciñep çıqtı.

Küzgä kürenmi torğan efir dulqınnarı, televidenie häm radiotapşırular bara torğan yışlıqlar däwlät möstäqillege häm cir astı, cir öste baylıqları kebek qimmätle närsälär bulıp sanala. Kemnär şuşı yışlıqqa xuca, nindi ilneñ mäğlümat taratu resursları kübräk, şular xäkim, şular ciñä digän süz. Soñğı yıllarda radio häm televidenie tapşıruları yışlıqların töbäklärdä tügel, ä barı tik Mäskäwdä genä bülälär. Xätta, 70-80 çaqrımğa ğına işetelä torğan ul'traqısqa FM yışlıqları da federal' konkurs komissiäsendä bülenä. Qazanda, Tübän Qamada yäki Sabada ğına işetelä torğan radioyışlığınıñ kem qulında buluı Tatarstanda tügel, barıber Mäskäwdä xäl itelä. 9-10 keşelek konkurs komissiäsenä Rusiäneñ mäğlümat agentlığı, iñ zur telekompaniälär wäkilläre, Vladimir Pozner kebek ataqlı jurnalistlar kerä. Tapşırular baraçaq töbäktän başqarma xakimiättän ber wäkil, qanun çığaru xakimiätennän ber wäkil, federal' okrugtan – ber wäkil şul uq komissiäneñ eşçänlegendä qatnaşa. Yäğni, Tatarstanda baruçı tapşırunıñ yışlıqları turında süz barğanda, Mäskäwdän çittäge töbäktän tağı 3 keşe komissiägä östälä.

Çärşämbe könne bulğan konkursta Mäskäwdäge citdi häm märtäbäle kompaniälär, tä'sirle wäkillär bulsa da, bu yışlıq Qazandağı kompaniägä eläkkän. Şulay itep, Kul'tura kanalı, Mayaq radiosı häm başqa tä'sirle kompaniälär Qazanda baraçaq bu yışlıqnı qulğa töşermädelär. Komissiä Qazan argumentlarına kübräk qolaq salğan. Dimäk, Tatarstan-YÄ-a ğasır kompaniäseneñ ike teldä bara torğan tapşıruları kübräk mömkinlekkä iä bulaçaq.

Şul uq bäygedä qatnaşqan Quray radiosınıñ bu yulı ciñä almawı – qızğanıç. Läkin ägär dä älege yışlıq Tatarstan-Yaña ğasırğa birelmäsä, anı hiçşiksez federal' külämdäge zur kompaniälär üz qullarına alğan bulır idelär. Şuña kürä xäzerge Quraynı elekke dulqında tıñlap torırğa turı kiler.

Rimzil Wäli

XS
SM
MD
LG