Accessibility links

җомга, 9 декабрь 2016, Казан вакыты 06:55

Tatarstanda dini belem burüneñ sıyfatın tikşerdelär


23 dekaber könne Bötendönya tatar kongressı binasında respublikanıñ konfessiäara mönäsäbätlär mäs’äläläre buyınça komissiä utırışı uzdı. Anda möselman din ähelläre häm respublika xökümäteneñ Din eşläre buyınça Şura citäkçese Rinat Näbiev belän bergälektä Federal’ İminlek xezmäteneñ Tatarstan idäräse wäkilläre dä qatnaştı. Komissiäneñ utırışında bu yulı respublikada radikal dini ağımnarnı buldırmaw, dini mäğärif sistemasınıñ eşen caylaw kebek sorawlar tikşerelde. Komissiä utırışına bu yulı Qazannan, Çallıdan, Buadan, Älmättän, Tübän Kamadan Tatarstandağı barlıq möselman dini uqu yortlarınıñ wäkilläre çaqırılğan ide.

Cıyılışnı Rinat Näbiev alıp bardı. Ul üzeneñ açış süzendä, bar Rusiä möselmannarı Tatarstandağı dindäşlärenä qarap toralar, islamnıñ qaysı yünäleştän alğa baraçağında bez ürnäk bulırğa tieş, dip äytte. Şuña da, respublikada dini belem birügä ayıruça zur iğtibar birergä kiräklegen assızıqladı. Älege utırışta respublika Ministrlar Kabinetınıñ tellärne saqlaw bülege referentı Rinat Wäliullin da qatnaştı. Ul Azatlıq radiosı tıñlawçılarına 23 dekaberdä uzğan cıyılışta qaralğan mäs’älälär turında tulıraq itep söyli.

Tatarstanda bügenge köndä 9 dini uqu yortı eşläp kilä. Cıyılışqa şularnıñ rektorlar, uqu-uqıtu buyınça prorektorlar kilgän ide. Utırışta professional dini uqu yortları, anda belem birü sisteması, anda qullanıla torğan däresleklär mäs’äläse tikşerelde. Uqu yortları wäkilläre üzlärendäge uqıtu tärtibe belän tanıştırdılar, kiñäş, täqdimnären citkerdelär. Uqıtuda qullanılğan däresleklärneñ sıyfatı turında da fikerläşülär buldı. Ğomumän, cıyılış bik eşlekle ruxta ütte

Berniçä säğät barğan älege söyläşä waqıtında süz çit illärdän kilgän din uqıtuçıları häm uquçıları turında da bardı. Xökümät wäkilläre, alarnıñ sanın kimetergä täqdim itälär. Çönki, alar fikerençä, näq menä çittän kilüçelär Tatarstanğa islam dineneñ radikal’ ağımnarın alıp kilälär ikän. Şuña da, möselman uqu yortlarında nigezdä üzebezneñ din belgeçläre tatarstanlılarnı döres däresleklär yärdämendä uqıtırğa tieş, digän näticägä kildelär bu cıyılışta.

Gölnaz İlgizär

XS
SM
MD
LG