Accessibility links

сишәмбе, 6 декабрь 2016, Казан вакыты 13:24

Vladimir Putin: milekne kire däwlätkä qaytaru qanun nigezendä alıp barıla


"Yuganskneftegaz"nı satu qissası äle betmägän bulıp çıqtı, xörmätle tıñlawçılar. Rusiäneñ däwlät qulındağı "Rosneft" şirkäte üzeneñ xäzer "Yuganskneftegaz"nıñ yaña xucası buluın xäbär itte. "Rosneft" yäkşämbe könge satışta "Yuganskneftegaz" öçen 9 milliard 300 million dollar tülägän "Baykalfinasgrup"nı tulısınça satıp aluın belderä. Ä yıl başında Rusiä xakimiate "Rosneft"ne ikençe ber gigant - "Gazprom" belän berläşterergä cıyınuın äytkän ide. "Yuganskneftegaz" şulay itep yänä däwlät qulına qayta.

YUKOS häm elek anıñ töp citeşterü şirkäte sanalğan "Yuganskneftegaz" tiräsendäge xällär, Rusiä prezidentı Putinneñ pänceşämbedä ütkärgän yıllıq matbuğat oçraşuında da şaqtıy urın aldı, xörmätle tıñlawçılar. Putin alıp barğan üzäkläşterü säyäsäte iqtisadta xosusi qullardağı YUKOSnıñ elek tülämägän salımnarın kire qaytaru tırışlıqlarında häm näticädä "Yuganskneftegaz" şirkäten añardan tartıp alıp kire däwlät qaramağına qaytaruda çağıldı. Çärşämbedä Rusiäneñ "Rosneft" däwlät şirkäte, berniçä genä kön elek ütkän satışta "Yuganskneftegaz" öçen 9 milliard 300 million dollar tülägän "Baykalfinasgrup"nı tulısınça satıp aluın xäbär itte. Sovetlar tarqalıp, ildä xosusilaştıru başlanğannan birle bu milekne yañadan däwlätkä qaytarunıñ berençe oçrağı bulıp tora. Putin YUKOSnı inde küptännän 90-nçı yıllardağı başbaştaqlıq näticäsendä qorılğan "qırği kapitalizm" cimeşe dip tänqitläp kilgän ide. Monı ul pänceşämbe könne dä qabatladı, läkin şunısı qızıq, YUKOS turında söyläsä dä, anıñ isemen atamadı. Putin, "90-nçı yıllarda xosusilaştırunıñ niçek barğanın sez barığız da bik yaxşı beläsez, ul çaqta, xätta şul çordağı qanunnarnı bozğan xärämläşülär belän qayberäwlär milliardlarlıq däwlät milkenä xuca buldı. Xäzer isä däwlät tulısınça qanuni yullar aşa üz mänfäğätlären genä qayğırta häm min monı normal'' küreneş bularaq bäyälim" dip belderde.

Audio, Vladimir Putin

Rusiäneñ yağulıq şirkätlärenä qarata säyäsäte turındağı maxsus sorawğa cawap birgändä Vladimir Putin üzeneñ alarğa salımnarnı arttırunı yaqlawın, alarnıñ sotsial'' ölkädäge cawaplılığın köçäytü kiräklegen äytte. Şunda uq ul, "Rosneft"neñ "Baykalfinasgrup"nı satıp alıp üz qulına "Yuganskneftegaz"nı töşerüen bazar qanunnarı nigezendä eşlängän eş dip bäyäläde, däwlät şirkäte dä xosusiları kebek ük, berük xoquqlarğa iä dip belderde. Mäskäw elegräk "Rosneft"ne "Gazprom" belän berläşterergä cıyınuın xäbär itkän ide. Bu däwlät qulında gaznı da, neftne dä citeşterä torğan zur ber şirkät barlıqqa kiläçägen añlata häm ul Rusiädä genä tügel, bar dönyada da energetika ölkäsendäge iñ ere citeşterüçelärneñ berse bulaçaq. "Rosneft"neñ "Yuganskneftegaz"nı üzenä satıp aluın küplär Mäskäw Kremlendäge "silovik"lar qanatınıñ zur ciñüe bularaq bäyäli. Şul şirkätneñ idarä şurasın Putinneñ yaqın kiñäşçese, prezident idaräse başlığınıñ urınbasarı İgor Seçin citäkli. YUKOSnı ezärlekläw artında näq menä ul tora dip farazlana. Ä inde YUKOSnıñ çittäge citäkçelege "Yuganskneftegaz" kem qulına ğına eläkmäsen, anı kiläçäktä mäxkämälär kötä dip kisätä. YUKOS üzennän şuşı mölkäten alunı tanımıy, anı satışqa çığaru qanunsız ğämäl ide dip belderä.

Kärim Kamal
XS
SM
MD
LG