Accessibility links

Кайнар хәбәр

Sezgä nindi cır kiräk


Bu könnärdä Qazanda 3 tatar cır bäygese ütä. Alarnıñ berse - tatar cırın başqaruçılarnıñ İlham Şakirov isemendäge İkençe Xalıqara konkursı. Anı TR mädäniät ministrlığı, tatar däwlät filarmoniäse ütkärä. İkençese: Qazan turında iñ yaxşı cır bäygese. Anı“Bars-Media”kompaniäse yärdäme belän Qazan şähäre xakimiäte uzdıra. Öçençese: “Tatar cırı” festivale, anı ğinwarnıñ 12-16 qädär şul uq “Bars- Media” şirkäte ütkärä. Xäzer bu bäygelär turında tulıraq mäğlümat.

Bügenge köndä İlham Şakirov isemendäge cır bäygeseneñ berençe öleşe tämamlanıp kilä. Jyuri tarafınnan anda qatnaşqan cırlar inde tıñlanğan. Bu xaqta bäyge direksiäse wäkile Aygöl Sofiyskaya söyläde. Konkursnıñ geografiäse kiñ buldı. Cırçılar Qazannan, Tömännän, Omskidan, Penzadan, Nijnekamskiydan, Ästerxannan, Mäskäwdän, Orenburg ölkäsennän, Başqortstannan, Ufadan bik küp ide , Samaradan, Volgogradtan, Çistaydan Perm'nän, Kievtän dä bar ide. Ämma tögäl mäğlümatnı bez tik düşämbe genä birä alabız,- dide ul. Сır bäygeseneñ ikençe turına çığuçılarnıñ isemlege barı tik düşämbe könne genä bilgele bula ikän. Şulay uq Qazan şähär xakimiäte uzdıra torğan Qazan turındağı iñ yaxşı cır bäygese dä däwam itä. Anda barlığı 109 cır qatnaşa. Şularnıñ 55 — tatar telendä, rus telendä- 54 cır täqdim itelgän. Jyurinıñ isemlegen bügenge köndä älegä ser itep saqlıybız,- dide bezgä Qazan şähäre xakimiäteneñ mädäniät idäräse xezmätkäre Ruzilä Kamalova. Soñğı aralarda “Tatar cırı” festivale turında da bik küp yazalar. Anı maqtawlar da bar, tänqit süzläre dä yañğırıy. Mäsälän, festival' turında “İntertat” elektron gäzitendä tatar zıyalılarınıñ bu konkursqa qarata mönäsäbätläre yazılğan. 24 dekaberdä basılğan “Ватаным Татарстан” gäzite dä Tatar cırı turında yaza. 16 ğinwarda uzaçaq konsertqa biletnıñ bäyäse 2000-2800 sum ikän. Şulay bulsa da, biletlar satılıp betkän, dip yaza jurnalist Alsu Xasanova.“Altın bars” büläge belän bıyıl 20 cırçı büläklänäçäk, bäygedä 15 lawreat qatnaşaçaq. Festival'gä çit illärdän dä cırçılar kilergä tieş. Mäsälän, Finlyandiädän cırçı Cämilä kötelä. Çit illärdä dä tanılğan estrada yoldızı tatar qızı Alsuğa da çaqıru käğäze cibärelgän. Şulay uq Bars-Media kompaniäse Alsu belän xezmättäşlek turında kontrakt ta tözärgä teli ikän. Läkin bu mäs’älägä äle noqta quyılmağan. Çönki Alsu çit il kompaniäläre belän eşli häm anıñ eş grafigın Londonda tözilär ikän.

Azatlıq radiosı Mälikä Basıyr, Qazan.

XS
SM
MD
LG