Accessibility links

якшәмбе, 4 декабрь 2016, Казан вакыты 21:38

Tatarstanda taşlamalar urınına aqça tağın da kübräk tülänäçäk


Yaña yıl aldı könnärendä bäyräm itü genä tügel, ber-bereñä büläklär bireşü ğädäte dä bar. Uzğan atnanıñ iñ azağında, şimbä könne Tatarstan prezidentı Mintimer Şäymiev tä respublika xalqınıñ şaqtıy ğına öleşenä bik matur büläk yasadı. 25 dekaber könne ul yuqqa çığarılğan taşlamalar urınına tülänäçäk aqçalata kompensatsiä respublikada ike märtäbägä artaçaq, dip belderde. Bu respublika qaznasınnan tülänergä tieşle aqçalarğa qağıla. Älege xäbärne şul uq könne Tatar-inform agentlığı tarattı. Şulay itep, Rusiäneñ qayber töbäkläre qanun buyınça tieşle tüläwlärgä byudjettan aqçalarnı niçek tabarğa, dip baş watqanda, tatarstanlılar xökümättän başqalarğa qarağanda ike märtäbägä kübräk kompensatsiä alaçaq.

2005 yılnıñ 1 ğinwarınnan şuşı kübäytelgän külämdä aqça aluçılar rätenä xezmät veterannarı, tıl xezmätkärläre, repressiälängän häm reabilitatsiälängän keşelär kerä. Respublikanıñ Däwlät Şurası qabul itkän taşlamalarnı Tatarstanda aqçalata tüläwlärgä alıştıru turındağı qarardan soñ, xökümät Xezmät veterannarına 100, tıl xezmätkärlärenä häm repressiälängännärgä - 150, reabilitatsiälängännärgä 160 sum tülärgä bulğan ide. Xäzer isä, älege kategoriälärgä 200 sumnan alıp, 300 sumğa qädär tülänäçäk. Ber yaqtan, östälgän 100-150 sum aqça ällä ni zur bulıp kürenmäsä dä, älege tüläwlär yılğa respublika byudjetınnan östämä 600 million sumnı taläp itäçäk. Läkin, Mintimer Şäymiev fikerençä, niçek kenä qıyın bulsa da, Tatarstan mondıy çığımnarğa barırğa tieş. Çönki taşlamalar belän qullanuçılar öçen alarnı aqçalata tüläwlärgä alıştıru ciñel närsä tügel. Citmäsä, bu reforma toraq-kommunal xezmätläre öçen tüläwlärneñ artuı belän bergä turı kilä. Bez, qıyın bulsa da, Tatarstanda yäşäwçe taşlamalardan qullanuçılarnı yärdämnän taşlamasqa tieş, dip belderde Mintimer Şäymiev üzeneñ qararın iğlan itkändä.

Citäkçelärneñ başqa qayber qanun. Qararlarınnan yırmalı bularaq, Tatarstan prezidentınıñ älege qararı respublika xalqına bik oşadı. Qayber belgeçlär süzlärenä qarağanda, Tatarstanda aqçalata kompensatsiäseneñ külämen arttıru telägenä qänäğätsezlekne barı tik Rusiä xökümätendä genä beldergännär ikän.

Gölnaz İlgizär

XS
SM
MD
LG