Accessibility links

сишәмбе, 6 декабрь 2016, Казан вакыты 19:07

Prezident buluğa taba barğan Viktor Yuçenko Ukraina tormışında yaña säxifä wäğdä itä


Könyaq-könçığış häm könyaq Aziädäge tabiğät qazası, yäkşämbe kön bulğan ikençe ber möhim waqiğäne - Ukrainadağı prezident saylawlarınıñ ikençe turın qabatlawnı beraz artqa çigersä dä, düşämbedä ul yänä diqqät üzägenä mende. Tawışlarnı sanaw başlanu belän oppozitsiä nämzäte Viktor Yuçenkonıñ alda baruı kürende. Ul üzeneñ ciñüen iğlan itep, Ukraina 14 yıl buyı bäysez bulsa da, xäzer genä çın mäğnäsendä irekle ilgä äylände dip belderde.

Ukraina saylawlarınıñ ikençe turın qabatlaw ildä yaña prezidentnıñ kem bulaçağına nihayät açıqlıq kertte, xörmätle tıñlawçılar. Kievneñ Bäysezlek mäydanına cıyılğan oppozitsiä tarafdarları öçen anıñ kem buluı şik uyatmıy.

Audio

Häm Üzäk saylaw komissiäse bäyän itep torğan berençel näticälär dä, bu yulı köçle xalıqara küzätü häm şaqtıy qırıslatılğan qanunnar nigezendä uzğan tawış birüdä näq menä Viktor Yuçenkonıñ ciñep çığuın kürsätä. Ul üzen inde ciñüçe bularaq xis itä häm düşämbegä qarşı töndä ük Bäysezlek mäydanında cıyılğan xalıq qarşında çığış yasap oppozitsiä citäkçese, Ukraina xalqı üzeneñ köçle buluın rasladı, ul Könçığış Yevropadağı bälkem dä iñ oyatsız bulğan xakimiatkä qarşı baş kütärde dip belderde:

Audio, Viktor Yuçenko

"Bu bar Ukraina xalqı, Ukraina milläte öçen ciñü bulıp tora. Bez moña berniçä ğasır däwamında kildek, soñğı 14 yıl eçendä bez bäysez idek, xäzer isä bez irekle buldıq" di Ukrainanıñ yaña prezidentı bulırğa cıyınğan Yuçenko. Anıñ süzlärenä qarağanda, xäzerge prezident Leonid Kuçma, anıñ idaräse citäkçese Medvedçuk häm Viktor Yanukoviçneñ rişwätçelektä, keşe xoquqların bozuda, saylawlarda xärämläşüdä ğäyeplängän xakimiate inde tarixta qaldı.

Audio, Viktor Yanukoviç

"Ukrainada yaña säyäsi çor başlanıp kilä" di Viktor Yuçenko, häm bu xaqta millionlağan ukrain xiallanğan ide dip belderä. Ul üzeneñ Ukrainanı Yevropa Berlege häm NATO belän xezmättäşlek itügä borırğa cıyınuın yäşermi. Mäskäw belän mönäsäbätlärgä dä zur ähämiat birüen äytsä dä, Yuçenko, Ukrainağa nindider ber keçe qärdäşkä qarağan kebek qaraw çorı ütte dip belderä. Anıñ Rusiä citäkçelege tarafınnan açıqtan-açıq yaqlanğan köndäşe Viktor Yanukoviç üz kampaniäsen näq menä Mäskäw belän yaqınayunı yaqlawğa qorğan ide. Ciñelgänen tanırğa mäcbür qalaçağın añlağan Yanukoviç xäzer üzeneñ Yuçenkoğa qarşı qırıs oppozitsiäsägä küçäçägen belderä.

Audio, Viktor Yanukoviç

"Bügen min äxlaqnı tanımağan häm qanunnarnı ütämägän keşelär belän söyläşülär alıp barudan baş tarttım, ägär dä ciñeläm ikän, qatı oppozitsiägä küçäçäkmen, häm alar monıñ nindi oppozitsiä bulaçağın äle küräçäk" dip kisätä Viktor Yanukoviç. Anı bu yulı da urıslar küp yäşägän könyaq-könçığış ölkälärdä yaqlap tawış birdelär.

Kärim Kamal
XS
SM
MD
LG