Accessibility links

шимбә, 3 декабрь 2016, Казан вакыты 12:51

"Zöläyxa" filmı - Qazannıñ meñyellığına büläk, Ğayaz İsxaqinıñ yaqtı ruxına ber doğa


27 dekaberdä Ğ.Kamal isemendäge teatr binasında Ğ.İsxaqi äsäre nigezendä "Zöläyxa" näfis kinofilm premyerası buldı. Zalğa şığrım tulğan tamaşaçılar aldında filmnıñ rejisserı Rämil Töxvätullin çığış yasadı. Senariynı Rämil Töxvätullin "Zöläyxa" pyesasına nigezlänep Yunıs Safiullin belän bergä yazğannar. Ramil Töxvätullin iñ zur räxmätlären TR prezidentı Mintimer Şäymievqa häm filmnı töşerergä yärdäm itkän başqa räsmi şäxeslärgä häm barlıq qatnaşuçılarğa üzeneñ räxmät süzlären belderde. "Zöläyxa" filmı - Qazannıñ meñyıllığına büläk, Ğayaz İsxaqinıñ yaqtı ruxına ber doğa, -dip tämamladı Rämil äfände süzen.

Häm tamaşaçı “Zöläyxa” kinofilmınıñ serle eçtälegenä çumdı. Waqiğa Qazan guberniäsendä ХIХ ğasırda bara. Ğailä häm awıl tormışı çağıldırılğan filmda din häm fikerlär köräşe dä taswirlana. “Tatarlar arasında da kire möselman dinenä qaytu başlandı. Däwlät belän xalıq arasında tiñsez köräş bik ozaq däwam itä”. Fil''mda Qazan universitetı häm dini akademiäneñ professorı, keräşen mäktäben, Qazan uqıtuçılar seminariäseneñ oyıştıruçısı häm anıñ berençe direktorı missioner Nikolay İlminskiy belän törki tellär belgeçe dini akademiäneñ professorı Yefim Malovnıñ fiker alışuları ğibrätle. İlminskiynı da, missioner Malovnı da ber mäsälä borçıy: rus bulmağan xalıqlarnı xristian dinenä cälep itü. Ämma alarnıñ bu maqsatqa nindi yullar belän ireşergä teläw fikerläre genä ayırıla. N. İl''minskiy mäktäplär aşa barırğa täqdim itä: üzeneñ şäxsi aqçalarına keräşennär öçen mäktäp açıp, bukvar'' çığarıp, rus bulmağan xalıqlarnı xristian dinenä kertüen dälilläsä, Yefim Malov, bu eşne mullalarnıñ tatar xalqı belän mönäsäbätlären bozu aşa, alarnı qapma-qarşı quyıp berse belän bersen çäkeşterü maqsatı quyğan. Xäzer “Zöläyxa” k/fil''mınnan özek: Balalar uyınında da , olılar bäxäsendä dä din alıştıru, ruxnı köçläp tağu çağıla.Pop rolen başqarğan akter Azat Zaripovtan awır buldımı pop rolen başqarırğa digän sorawğa anıñ fikere mondıy buldı: “Bik awır buldı, çönki qayber waqıtlarda uraza waqıtına turı kilde. Xristiannı uynaw- ul möselman keşesenä bik awır”, -dide ul. Ä xäzer tarix fännäre doktorı Marsel'' Äxmätcanovnıñ fikere: “Malov köndälege buyınça bu däwer miña bik tanış. Bu fil''mdağı faciğäle xalıq yazmışı minem küz aldımnan uzğan kebek buldı ”,-dide ul. Medkolledj uqıtuçısı Zäytünä Xäbibullina häm Qazan mädäniät häm sänğät universitetı studentları fikere “Artistlarnıñ uynawları da bik yaxşı, fil''m bezgä bik oşadı, ämma tuqtawsız barğan muzıka keşegä nıq basım yasıy, muzıkasın kimetergä kiräk”,- dide ul. 3 student yeget fikere : “Kino bik yaxşı, bezneñ küñellärebez tuldı, ğomumän äytkändä, bez bik şatbız, şundıy tatar kinosı bulğanğa ”,- didelär alar bertawıştan. Bu fil''m Zöläyxa, tatar xatını yazmışı turında. Ul milli, dini mäs’älälärne çişkändä dä ğibrät alırğa yärdäm itä.

Mälikä Basıyr, Qazan

XS
SM
MD
LG