Accessibility links

җомга, 9 декабрь 2016, Казан вакыты 12:46

Qazannıñ şähär Şurası deputatları Vladimir Putinnı qunaqqa çaqıra


Tatarstanda Yaña yıl aldınnan törle oyışmalarda bergä eşläwçelär, xezmätkärlär cıyılıp, bäyräm itälär. Kem eş urınında çäy östäle äzerläp, üz köçläre belän bilgeläp ütä, bayraq, aqçalıraq cirdä – kafe, berär küñel açu urınına cıyılıp, maxsus bäyräm çaraların ütkärälär. Soñğı könnärdä Qazanda xezmättäşlär belän iske yılnı ozatıp, yaña yılnı qarşı alu kiçäläre uza. Başqalanıñ xakimiäte dä älege traditsiädän çittä qalmadı. Alar da düşämbe kiçendä cıyılıp, bäyräm ittelär. Läkin Qazan xakimiätendä eşläwçelär yaña yılnı eş urınnarında tügel, ä başqalanıñ Piramida küñel açu üzägendä bilgeläp üttelär. Xakimiät xezmätkärlären qotlarğa Mäskäwdän rus estradası yoldızı İrina Saltıkova da kilgän ide.

Ä bäyräm itär aldınnan, Qazan xakimiäte wäkilläre, şähär Şurası deputatları qatı ğına eşläp tä aldı. İnde xäbär itkänebezçä, 24 dekaber könne Şuranıñ çirattağı sessiäse uzdı. Anda deputatlar şähärneñ xakimiät başlığı Kamil İsxaqov citäkçelegendä başqalanıñ tuğrasın qabul itte, küpsanlı qarar häm qanunnar tikşerde. Utırışnıñ axırında isä Şura deputatları tağın ber möhim ğämäl qıldılar. Ber millionnan artıq qazanlılar isemennän alar Rusiä prezidentı Vladimir Putinğa xat yulladılar. Xatta Qazannı yuğarı bäyälägän öçen Putinğa zur räxmätlär äytelä. Belgänegezçä, Rusiä prezidentınıñ 23 dekaberdä jurnalistlar belän oçraşuında Qazan turında da süz buldı. Sezneñ çığışığıznı bez Qazannıñ meñyıllığına kilergä zur telägegez, dip añladıq, bu bezneñ öçen bik zur şatlıq, dip yazılğan Kamil İsxaqov imzalağan älege xatta. Rusiä prezidentınıñ tayanıçı belän ruxlanğan Qazan şähäre deputatları şähär xalqı isemennän başqalanıñ meñyıllığın matur itep ütkärergä süz birälär. Alay ğına da tügel, xatta kazantsı prilojat vse silı dlya udvoeniya svoego territorial’nogo valovogo produkta, ukrepleniya Rossiyskoy derjavnosti i mogusçestva, yäğni, qazanlılar töbäkneñ tulay produktın ike märtäbä üsterügä häm Rusiäneñ xakimlegen, qüäten, qödräten üsterügä bar köçlären dä salaçaq, dip yazılğan. Vladimir Putinğa älege möräcäğät deputatlar tarafınnan ber tawıştan qabul itelgän. Şunısı qızıq, älege xat inde 24 dekaber könne ük imzalanıp cibärelsä dä, bu xaqta mäğlümät çaralarında ber genä xäbär itüçe dä bulmadı.

Gölnaz İlgizär.

XS
SM
MD
LG