Accessibility links

Кайнар хәбәр

Ğiraq sönniläre ildäge xakimiat şığıylarğa küçär dip qurqa


Ğiraqtağı sönni ğäräplärneñ iñ ere säyäsi partiäse kiläse ay azağına bilgelängän ğomumi saylawlarda qatnaşmayaçağın belderä. Monı ul ildäge iminlek xäleneñ andıy tawış birü ütkärerlek däräcädä bulmawı häm xökümätneñ saylawlarnı kiçekterergä telämäwe belän añlata. Şuña kürä dä Ğiraqnıñ İslam partiäse Bagdadtağı waqıtlı xakimiat zur ömetlär bağlağan şul saylawlarda qatnaşmayaçaq.

Ğiraqnıñ İslam partiäse Quşma Ştatlar yaqlawı belän eşläwçe waqıtlı xökümätkä kergän iñ zur sönni ğäräp säyäsi partiäse ide, xörmätle tıñlawçılar. Ämma soñğı aralarda ul, bu xakimiat sönni mönfäğätlären bötenläy qayğırtmıy dip, waqıtlı xökümätkä arqası belän basa başladı häm uzğan ayda amerikannar Fälüca şähärenä höcüm itkännän soñ İyäd Ğälläwi xökümätennän çığuın xäbär itte. Xäzer inde sönni ğäräplär partiäse 30-nçı ğinwarğa bilgelängän ğomumi saylawlarda bötenläy qatnaşmayaçağın äytä. Ä anda Ğiraqnıñ yaña Milli Mäclesen saylaw qaralğan. Ul üz çiratında ilneñ yaña xökümäten bilgelärgä häm yaña Konstitutsiäne äzerläw öçen maxsus xäyät qorırğa tieş. Düşämbedä şuşı partiäneñ räise Möhsin Ğäbdelxämit, ildäge wäzğiat mondıy tawış birülärne oyıştıru öçen citärlek däräcädä imin tügel häm bez şuña kürä saylawlarda qatnaşırğa cıyınmıybız dip belderde. Ämma ul berük waqıtta, Ğiraqnıñ İslam partiäse üze qatnaşmasa da, xalıqnı bu tawış birügä kilmäskä öndämäyäçäk dide.

Audio, Möhsin Ğäbdelxämit

"Bez üzebezneñ genä qatnaşmayaçağıbıznı belderäbez, bu saylawlarda nindi şartlar ütälgän oçraqta ğına qatnaşa aluıbız xaqında bez elektän ük äytep quyğan idek. Alar ütälmäde. Bar ildä ütkärelmägän oçraqta bu saylawlar ğomumi bula almıy" dip belderä Ğiraqtağı sönni ğäräplärneñ iñ ere partiäsen citäklägän Möhsin Ğäbdelxämit. Şuşı partiä Ğälläwi xökümäten tawış birüne ildäge wäzğiat yaxşırğançı hiçyuğı altı ayğa kiçekterep toruğa öndägän ide. Soñğı atnalarda çınnan da, Ğiraqtağı ğisyançılarnıñ bigräk tä sönnilär yäşägän töbäklärdä törle höcümnär yasawı kisken arttıp kitte. Dubaydağı Farsı qultığın tikşerü üzägendä eşläwçe Mostafa Alani, sönnilärneñ töp partiäse çınnan da iminlek xäle saylaw näticälärenä tiskäre yoğıntı yasıy ala dip qurqa häm alar andıy şartlarda tawış birüdä qatnaşırğa telämi dip belderä.

Audio, Mostafa Alani

"Alar sönni ğäräplär yäşägän töbäklär imin tügel dip isäpli. Häm alar tawış birüdä qatnaşqan oçraqta da, totrıqsızlıq arqasında şaqtıy ğına tawış yuğaltaçağın belä" di Ğiraqtağı xällärne küzätep baruçı Mostafa Alani. Anıñ fikerençä, sönnilär torğan sayın nığraq, saylawlarnı xäzer ütkärü alarnıñ mänfäğätlärenä zian ğına kiteräçäk digän fikergä kilä. Sönni ğäräplär şul saylawlar näticäsendä Ğiraqtağı xakimiat şığıylar qulına küçä ala dip qurqa. Bu uñaydan ildä, näq şul maqsatta kürşe İran da Ğiraqtağı şığıylarğa yardäm itä digän farazlar tarala. Yänä Mostafa Alani:

Audio, Mostafa Alani

"Ğiraq xökümätendäge şaqtıy ğına ministr däräcäsendä, İran saylawlarğa tä''sir itärgä tırışa digän süzlär yöri, häm andıy şartlarda sönnilärneñ, bar awırlıqlar häm mömkin tıqşınular sürätendä tawış birüdä qatnaşa aluına min bik ışanmıym" di Mostafa Alani. Tähran Ğiraq eşlärenä tıqşınuın kire qağa.

Kärim Kamal
XS
SM
MD
LG