Accessibility links

чәршәмбе, 7 декабрь 2016, Казан вакыты 00:46

Tuzğan toraqnı beterü programması tämam, 2005 yılda yañası başlana


Tuzğan toraqnı beterü programması 1995 yılda başlanıp kitkän. Şul uq waqıtta «Toraq fondı» da oyıştırğan, isemleklär tözelä başlağan. Programmanıñ ütäleşe öçen küpçelek aqçanı berençe waqıtta neft şirkätläre birgän bulğan. Annan soñ, respublikanıñ başqa ere şirkätläre dä aqça kertkän, banklar, eşmäkärlär, keçe neft oyışmaları da tuzğan toraqnı beterü programması öçen tabışlarınnan salım tüläp torğan. Barlığı 35 meñnän artıq oyışmadan finans yärdäm alındı, 20 576 million sum aqça cıyıldı, dielä räsmi käğäzlärdä. Tuzğan toraq programması ütälgän waqıtta barlığı 48 576 meñ ğailä yaña fatirlarğa küçkän.

Berniçä yıl elek, Tatarstan qanunnarı äle täñgälläşterelmägän waqıtta, qayber eşmäkärlär tuzğan toraq programması öçen salımnı tüläwdän baş tartmaqçı ide. Salım qanunsız, dip tä äytep qaradılar, tülämiçä, xakimiätlär belän qarşılıqqa dä kerdelär, ämma, barıber, programma ütäleşe tuqtamadı. Soñınnan salım, irekle tüläw itep üzgärtelde, häm oyışmalar, bigräktä neft tarmağında eşläwçelär, programmaga tüläwlärne irekle räweştä küçerep bardı. Häm 29 dekaberdä şuşı programmağa üz öleşen kertkän ere şirkät citäkçeläre, rayon başlıqları, ministrlar, başqa oyışma citäkçeläre Piramida binasında programmanıñ tämamlanu waqiğasın bäyräm itte. Mul öställär artında utırğan citäkçelär aldında, Prezident çığış yasap, här qaysın diärlek iseme belän atap, räxmätlären belderde, istälekle diplomnar tapşırdı. Tuzğan toraqnı beterü programmasınıñ tämamlanuına bağışlanğan tantanada 14 balalı ğailägä fatir açqıçları tapşırıldı. Ämma tözeleş eşläre anıñ belän genä betmi, 2005 yıldan sotsial ipoteka programması ğämälgä kerä. Mintimer Şäymiev üzeneñ çığışında anıñ eçtälegenä dä beraz tuqtaldı. Sotsial ipoteka yulı belän alınğan fatirlarnıñ yartı bäyäse öçen aqçasın 7 yıl eçendä qaytarırğa kiräk bulaçaq. Sotsial yaqtan yaqlanmağan ğailälärgä dä, yaña öyläneşkän yäşlärgä dä programmada uñay şartlar qaralaçaq ikän. Tatarstannıñ yaña toraq programması 28 yıl yarım buyına, 7% -lıq kreditnı tülärgä mömkinlek birä. Bala tuğan bulsa, 18 kvadrat metr öçen tüläw yuq iteläçäk.

«Toraq tözeleşenä däwlät yärdämen kürsätü» qanunına Prezident tarafınnan 27 dekaberdä qul quyılğan. Ä programma kiläse yıldan ğämälgä aşırıla başlıy.

Bikä Timerova.

XS
SM
MD
LG