Accessibility links

пәнҗешәмбе, 8 декабрь 2016, Казан вакыты 08:54

2004 yılda tatar yäşläre tormışına küzätü


İske yıl belän xuşlaşu könnärendä uzğan yılda tatar yäşläreneñ tormışında bulğan qızıqlı waqiğalarğa, oçraşularğa yomğaq häm näticä yasarğa waqıt.

"İdelem Aqçarlağı" bäygese bıyıl bişençe tapqır ütkärelde. Poeziä, proza, dramaturgiä janrlarında icat itüçe yäş talantlar arasında Lenar Şäyex, Läysän Möxtäsimova ciñü yauladı. Yaña yılda ciñüçe lawreatlarınıñ icadi “cimeşläre” basılğan kitapnı täqdir itü kiçäse bulaçaq.

"Yağımlı yaz" bäygesendä yäş millättäşlärebez cır, biü, süz ostalığı ölkäsendä üzlären sınap qaradı. Älege bäygedä çit töbäklärdän kilgän tatar yäşläre dä qatnaştı.

Qazannıñ "Sälät" üzäge bıyıl 10 yıllıq yubiley kiçäsen ütkärde. Şul nisbättän konsertlar zalında bik üzençälekle kiçä buldı. "Sälät"neñ citäkçese Cäwdät Söläymanov icatı nigezendä tözelgän "Tamırlar" kantatası xalıq küñelendä äle ozaq saqlanır.

Tuqay klubında ütkän “Şiğri Sabantuy”da yäşlär jyuri xökemenä üzläreneñ şiğerlären täqdim ittelär. Sälätle yäşlärne jyuri äğzäläre arasında bulğan küptän tügel arabızdan kitkän mäşhür şağirebez İldar Yuziev ta tıñlap söyengän ide.

Şulay uq universitetnıñ ike yöz yıllıq yubileena bağışlanğan konferensiälär, oçraşular, konsertlar, universitetnıñ tatar fakul''tetı studentları oyıştırğan “Ällüki” tügäräge dä, älbättä, iğtibarğa layıq.

Ämma tatar yäşläreneñ tormışında bulğan iñ möhim waqiğa ul Qazanda iyün ayında ütkän Bötendönya tatar yäşläre forumıdır möğayın. Tatarstannan, Rusiäneñ törle töbäklärennän kilgän 800gә yaqın yäş millättäşlärebez bügenge köndä tatar yäşlären borçığan problemalarnı urtağa salıp, fiker alıştı. Cıyılışta forumnıñ räise, Qazan byurosı äğzäläre saylandı. Ä dekaber ayında ütkän forumnıñ ikençe cıyılışında forumçılar yasalğan eşlärne näticäläp, yaña plannar belän urtaqlaştı. Forum eşçänlegeneñ näticäse ul bügenge köndä uñışlı ğına eşläp kilüçe tatar KVNı.

Rusiäneñ törle töbäklärendä yäşäwçe küp kenä tatar yäşläre uqırğa Qazanğa aşqına. Bıyıl ğına Tatar kongressı bülep birgän kvota aşa Qazannıñ yuğarı uqu yortlarına 80 keşe uqırğa kerde. Şuşı çittän kilüçe yäş millättäşlärebez uquda kürsätkän tırışlıları belän ayırılıp toralar. Moña ber misal Orenbur şähärennän kilgän Liliä Noğmanova. Bıyıl ul 23 yäşendä aspiranturağa kerep, ekonomika fäne buyınça dissertatsiä yaqladı.

Çit töbäklärdän kilgän yäşlär belän bez törle cıyılışlarda, şiğri kiçälärdä oçraşıp torabız. Qazan, tatar bezne berläşterde. Bu bigräk tä 2004 yılda açıq kürende.

Albina Zäynulla, Qazan

XS
SM
MD
LG