Accessibility links

якшәмбе, 11 декабрь 2016, Казан вакыты 09:09

Prezident itep saylanğan Yuçenko köndäşe Yanukoviç citäklägän xökümätneñ kiçekmästän kitüen teli


Çärşämbe Kievtä prezident saylawlarında ciñep çıqqan Viktor Yuçenko tarafdarlarınıñ Ukraina xökümäte binasın çornap aluı belän başlandı, alar şulay itep, ciñelgän premyer-ministr Yanukoviçneñ xökümät utırışın ütkärergä cıyınuına qarşı çığarğa teläde. Berniçä atna elek Ukraina parlamentı Verxovni Rada aña ışanmawçanlıq beldergän ide. Läkin Viktor Yanukoviç xökümät binasına kilmäskä buldı, ä ministrlar añardan başqa ğına utırışın başqa urında ütkärde.

Oppozitsiä tarafdarların ukrain xökümäte binasına kerü yulın yabuğa saylawlarda ciñgän Viktor Yuçenko üze çaqırğan ide. Şuşı öndämäse belän ul çärşämbegä qarşı töndä Kievneñ Bäysezlek mäydanında barğan cıyında çıqtı.

Audio, Viktor Yuçenko

"Min sezdän çärşämbe irtädän ük xökümät binasına kerü yulın yabunı ütenäm" digän möräcäğät belän çıqqan ide Viktor Yuçenko. Yözlägän keşe anıñ şuşı üteneçenä qolaq salıp, irtädän ük Ukraina xökümäte urnaşqan urınğa barıp bastı.

Audio

Oppozitsiä tarafdarlarınıñ şuşı şawşulı tırışlıqları uñışlı tämamlandı diärgä bula, xökümät wäkile Anatoli Tolstuxov ministrlarnıñ utırışı kiçekterelde dip belderde. Ämma soñraq xökümätneñ üz cıyılışın barıber ütkärüe, anıñ finans ministrlığı binasında uzuı mäğlüm buldı. Döres, anda äle genä yaldan çıqqan premyer-ministr Yanukoviç üze qatnaşmağan, utırışnı berençe vitse-premyer Mikola Azarov alıp barğan. Anıñ süzlärenä qarağanda, bar diärlek ministrlar häm alarnıñ urınbasarları qatnaşqan şul cıyında 60-lap iqtisadi wä sotsial'' mäs''älä qaralğan. Viktor Yuçenko yağı, Yanukoviçneñ Verxovni Radada yaqlaw qazana almağan xökümäte xaqimiattä qala almıy dip isäpli. Parlament berniçä atna elek aña ışanmawın beldergän ide. Läkin Konstitutsiä nigezendä xökümätne eşennän barı tik prezident qına ala ala, läkin ul älegä monı eşläwdän baş tarqtan ide. Oppozitsiä xäzer, prezident saylawlarında ottırğan Viktor Yanukoviç soñğı mizgeldä genä üz xökümäte aşa köndäşe Yuçenkonıñ aldağı prezidentlığın qatlawlandırırlıq qararlar qabul itä ala dip şürli. Ä älegä ul üzeneñ ikençe turnı qabatlawda ciñelüen tanudan baş tarta. Xäzer ul Ukrainanıñ Üzäk saylaw komissiäsenä berniçä şikäyät yulladı, ä komissiäneñ üz ğämällären Yuğarı mäxkämägä birergä buldı. Yanukoviç fikerençä, öydä tawış birü öçen şartlar tudırmıy komissiä 4 millionnan artıq olı yäştäge häm ğärip keşelärneñ saylaw xoquqların bozğan. Xärämläşü mömkinleklären kimetü öçen öydä tawış birüne maxsus qararı belän parlament üze betergän ide. Saylawlarğa ber kön qalğanda Ukrainanıñ Konstitutsiä mäxkämäse, bu ukrain watandaşlarınıñ saylaw xoquqların boza digän qarar çığardı häm xoquqi wäzğiat şulay itep tämam butaldı. Yanukoviç yağı xäzer şuñardan faydalanıp, qabat tawış birü näticälären dä şik astına quyarğa teli häm asılda Viktor Yuçenkonıñ ber ay elek eşlägän ğämällären qabatlıy. Küzätüçelär fikerençä, här yaq ta - ciñüçelär dä, ottırğannar da - inde kiläçäkne qayğırta häm 2006-nçı yılda uzaçaq parlament saylawların küz aldında totıp, köndäşen xälennän kilgänçä, şul isäptän xoquqi yaqtan da köçsezländerep, üzen yaqlawnı mömkin qädär kiñäytergä tırışa.

Kärim Kamal
XS
SM
MD
LG