Yaña yılğa äzerlek iñ yuğarı noqtağa citte. TV tapşırularında Qazan häm başqa respublika şähärlelärendä açılğan çırşı bäyrämnäre turında xäbärlär töp urın alıp tordı. Şähär uramnarı bäyämçä bizälde, çırşılar törle utlar belän yanıp tordı. Uram buylap yörgän qış babaylarğa aptırap kitüçelär bik bulmadı. Kibetlärdä sovet zamanındağı şikelle çiratlar xasil buldı. Zamança xatın-qızlarnıñ tabın äzerläp torası kilmi, inde peşerelgän, turalğan, butalğan, kiseklärgä bülep quyılğan äzer rizıqnı alır öçen, säğätlär buı çiratlarda toralar keşelär. Büläk satuçı kibetlärdä dä çiratlar, uyınçıq ätäçlär tiz arada satılıp betä. Yaña yıl aldınnan kinät bäyälärne üsep kitüe dä, satıp aluçılarnı tuqtamadı. Yıl buı salmaq qına säwdä itkän kibetlär xäzer tulı qüätkä eşli. İrtän başlap, töngä qädär kibetlär açıq häm keşe belän tulı.
Şul uq waqıtta, röxsätsez urınnarda kiselgän çırşılar turında xäbärläp kilep tora. Soñğı könnärdä urmanğa zıyan kiterelgän 500dän artıq oçraq terkälgän. Bazarda da çırşılarnı, hiç yuğı ılıslı botaqlarnı satıp alıp bula. Urtaça bäyä – 50 sum.Qazanda tanış beleşlärgä yış birelgän soraw xäzer, beläsezme nindi? Keşelär ber bersennän, qayda häm niçek yaña yılnı qarşılaw turında qızıqsına. Kemder ğailäse belän öydä genä ütkerä, kem der, restoranğa bara, öçençelär başqa şähärgä yäki kurortqa kitä ikän. Turistik şirkätlär, yaña yılğa cılı yaqlarğa yullamalarnı satıp betergän inde. Ğinwarnıñ berençe 10 könenä yallar turı kilgängä kürä, aqçalı keşelär alarnı Misır, Törkiä, şul uq Tailandtta ütkärergä teli. Qazanda, Tatarstanda qaluçılarğa da bäyrämne küñelle ütkärü mömkinlege bar. Yaña yıl tönen restoranda uzdırır öçen, aldan uq söyläşep quyası bulğan. Qazan restorannarında, kofelarda urınnar yuq inde. Soñğı waqıtta keşe arasında, üzeñ äzerlämägän tabın yanında, bäyräm tamaşasında qatnaşıp qarşılaw ğädätkä kerep bara. Restoranda yaña yıl tönen uzdırır öçen kimendä 2-3 meñ sum äzerläp quyarğa kiräk.
Yaña yıl tamaşalarında balalar belän bergä, olılar da qatnaşa. 30 dekaberdä Qazanda, iñ zur, iñ qupşı çırşılarnıñ berse, Qazan milli mädäni üzäge yanında Çırşı bäyräme ütkärelde. Anda balalar belän bergä olılar da buldı. Qış babay häm qar qızı da kilde.Yaña yıl tönendä Qazanda, zur çırşılar torğan urınnarda, bäyräm tamaşaları, uyınnar, biülär, salyut bulaçaq.
Bikä Timerova.
