Accessibility links

пәнҗешәмбе, 8 декабрь 2016, Казан вакыты 11:04

2004 yılda Tatarstan matbuğatı


Azatlıq radiosında här şimbädä alıp barılğan “Tatarstan matbuğatına küzätü” tapşıruları 2004 yılnıñ ğinwar ayınnan başlap tatar telendä bastırılğan jurnallarğa yasaldı. Yıl eçendä barlığı 52 tapşıru yañğıradı. Bez küzätü yasağan jurnallar isemlege barlığı 16 ga tuldı. Tatarstanda çıqqan jurnallarnıñ tirajın bergä quşıp sanasañ 90 meñgä yaqın san çığa . Ä Başqortstandağı ike jurnalnıñ sanı 22 meñgä yaqın . Alar arasında “Ğasırlar awazı” , Qazan utları“, “Mäydan” , “äl-Qibla ”, “Tatarstan”, “Miras”, “Fän häm tel”, “Söyembikä”, “Mäğärif”, “Säxnä” “ İdel”, “Yalqın” , “Salawat küpere”, “Sabıyğa” . Şularnıñ 14 Tatarstanda bastırılğan, ä 2 se “Tulpar” belän “Ällüki” jurnalları tatar telendä Başqortstanda çıqqan jurnallar buldı. 2004 yılda çıqqan “Axun awılınıñ näsel tarixı” isemle kitap çığu uñayınnan, şunnan soñ, Mäğärif näşriätendä çıqqan “Ädäbi äsärlär”turında häm tağın ber ör-yaña dini jurnal bastırıla başlaw säbäple ”äl-Qibla” isemle dini jurnalğa küzätü yasaldı. Tapşırularnı ğalimnär, yazuçılar, şağirlär qatnaşlığında Mälikä Basıyr alıp bardı. Tapşıruda tatarlar arasında bik abruylı şäxeslär , törle ölkädä tanılğan ğalimnär Xatip Miñnegulov, Marsel'' Äxmätcanov, Änwär Xuciäxmätov, Rämil'' İslamov, Räşit Şakircanov, Ğabdelxak Şämsetdinov, Rifat Fättaxov, yäşlärdän : İl''yas Mustakimov, Aysılu Galiaxmätova; yazuçılar, şağirlär: Näcibä Safina, Rädif Ğataş, İlsöyar İksanova, Raşat Nizami, Firdäwes Zarif, Luara Şaqircan, Almaz Xamzin, Ramil Miñnäxmätov, Lyutsiä Gizzatullina, Saniä Äxmätcanovalar qatnaştı. Ayırıp äytergä kiräk Näcibä Safinanıñ bu tapşırularğa salğan xezmäten. Ul 9 tapqır çığış yasağan. Ä xäzer Näcibä Safina qatnaşlığında äzerlängän oktäber ayında çıqqan “Qazan utları”jurnalına tapşırudan özek biräbez. Häm sez 2004 yılda bulğan tapşırularnıñ oktäber ayında çıqqan Söyembikä jurnalına yasalğan tapşırudan özek tıñlağız. Jurnalnıñ bu sanı kübräk mädäniät xezmätkärlärenä bağışlanğan.Anda tanılğan kompozitor Mäsgüdä Şämsetdinovanıñ Amerikada icat itkän Çınğızxan simfoniäsen S.Säydäşev isemendäge zur konsert zalında tamaşaçığa işetterüe turında yazma bar. Çınlap ta tanılğan kompozitor Mäsgüdä Şämsetdinovanıñ xıyalı tormışqa aştı. S.Säydaşev isemendäge zur konsert zalında 8 dekaberdä Tatarstan kompozitorlar berlegeneñ Simfonik konsertında Çıngızxan simfoniäse yañğıradı. Tatarstan matbuğatına küzätülärdä alda äytep kitkän jurnallarda basılıp çıqqan çäçmä äsärlär, şiğriät, drama äsärläre , ädäbiät tarixına qağılışlı materiallar, fän ölkäsendäge yañalıqlar, yubileylar turında mäğlümatlar yaqtırtıldı.Şunı da äytep kitärgä kiräkter, Qazan utları, jurnalında “Bezneñ zaman geroe” dip isemlängän bäxäs-diskussiädä çığış yasağan ğalimnär , yazuçılar, möğallimnär häm jurnalnı daimi uqıp baruçılarnıñ ädäbi yazmaları dönya kürde. Başqa jurnallarda da xatlar aşa, törle bäygelär oyıştıru uñayınnan uquçılar belän açıq söyläşü alıp barıldı. Ä bit bu jurnalllarnı uqıp çıqmıyça, anda uquçınıñ iğtibarın cälep itärdäy bik küp jurnal bitlärendä çıqqan materiallar arasında şul 4-5 minutqa sıyıp betärlek itep efirdan söylär öçen, älbättä, anı äzerlägändä bik küp waqıt sarıf itelä. Şuşı tapşırularnı oyıştırğan waqıtta Azatlıq radiosı täqdimen qabul itep, jurnallarğa analiz yasap radio tapşırularında qatnaşqan keşelärgä Qazan studiäse bik räxmätle. Radio tıñlawçılarnıñ “Tatarstan matbuğat küzätüe” tapşıruına mönäsäbätläregez bezne bik tä qızıqsındıra. Fikerläregez täqdimnäregez bulsa bezgä yazıp cibäregez.

Mälikä Basıyr, Qazan

XS
SM
MD
LG