Accessibility links

пәнҗешәмбе, 8 декабрь 2016, Казан вакыты 07:01

Udmurtiädä tağın ber üzeşçän kompozitor barlıqqa kilde


Udmurtiädä yäşäp tatar telendä şiğerlär icat itüçe, cırlar yazuçı millättäşlärebez sanı baytaq. Bügen sezne cır sänğätenä canı täne belän birelgän Firdäwes Sabir ulı Mortazin belän tanıştırabız. Firdäwes İjaw şähärendä tuıp üskän. Ul uqığan yıllarda mäktäplärdä tatar tele uqıtılmağan, tatar mäktäbe dä inde yabılğan bulğan. Ğailädä milli tärbiä alğan. Şuşı millilek xise Firdäwesne ğomumi i häm sänğät mäktäben tämamlağaç, tatar sänğäte belän yaqınraq tanışu niäte Qazan mädäniät institutına kitergän. İnstitutnı uñışlı tämamlap, İjawğa qaytıp balalar sänğät mäktäbendä bayan, akkordeon klassında yegetlärgä-qızlarğa bu uyın qoralında uynaw serlären añlata başlıy. Programmada qaralğan äsärlär belän berrättän tatar kompozitorları icatına da iğtibar birä uqıtuçı. Anıñ klassında uqığan balalar şähär küläme–ndä oyıştırılğan törle kiçälärdä näq tatar muzıkasın başqara ide. Tatar ictimaği üzäge muzıka uyın qorallarında uynawçı balalar arasında bäygelär uzdıra başlağaç ta, Firdäwes Sabir ulı üzeneñ şäkertlären älege bäygegä alıp kilde. Alar ostazların sınatmadılar. Mortazinnıñ uquçıları berençe yıllarda uq berençe premiälärgä layıq buldılar. Alar arasınnan Gölnaz Nuriäxmätovanı misal itep kiterergä mömkin. Gölnaz inde İjawda muzıka uçilişçesın tämamlap, Mäskäwdä yuğarı belem aluın däwam itä. Firdäwes Sabir ulı balalar uqıtu belän genä çiklänep qalmağan. Ul äle tatar ansambl'läre belän dä şöğellänä. Başta cırçılarğa bayanda ğına uynap çiklänsä, soñraq qaysıber cırlarğa eşkärtmälär dä äzerli, soñraq üze dä cırlar yaza başlıy. Anıñ xäzer distädän artıq cırları bar. Alarnı xalıqqa citkerü niäte belän başqaruçılar ezli häm muzıka uçilişçe studentçası Larisa Gaynetdinova belän oçraşa. Repetitsiälär inde näticäsen dä birde — noyäber ayında «İman» tatar yäşläre oyıştırğan «Yoldız yulı» bäygesendä Larisa Gaynetdinova Firdäwes Mortazin cırın başqarıp berençe premiägä layıq buldı. Bu äle berençe bäygedä qatnaşu, häm jyuriğa, xalıqqa üzeneñ berençe cırın täqdim itü ide, dip urtaqlaştı Firdäwes Mortazin. Kiläçäktä Tatarstan, Başqortstanda tatar cırı konkurslarında qatnaşırğa niätläre bar alarnıñ. Şulay uq tulı konsert programması äzerläp, icat kiçäse oyıştırırğa da teläkläre yuq tügel. Ä xäzer Firdäwes Mortazinnıñ Firaya Zıyätdinova süzlärenä «Ä bez bareber köläbez» isemle cırın sezneñ iğtibarığızğa täqdim itäbez. Larisa Gaynetdinova cırlıy. Xamidä Ğayfullina, Udmurtiä

XS
SM
MD
LG