Accessibility links

җомга, 9 декабрь 2016, Казан вакыты 12:55

Könyaq Aziädä tsunamida hälak buluçılar sanı 130 meñgä citä


Cir terträwneñ üzäge bulğan İndoneziäneñ Sumatra utrawına iñ yaqın bulğan Açeh provinsiäse – iñ küp ziyan kürgän töbäk buldı. Anda 80 meñgä yaqın keşe hälak bulğan. Tailand sälämätlek saqlaw ministrı urınbasarı Suxai Çaroen-rata-nakuk, wazğiätne – atom bombası şartlawına tiñläp: "Häläkät bik tiz waqıt eçendä buldı. Tabılmağan mäyetlär dä küp äle. Bu suğış waqıtı kebek. Atom bombası kebek. Mäyetlärne tabırğa östämä köç tabırğa kiräk, alarnıñ kübese su astında", dip belderde Tai sälämätlek ministrı urınbasarı. İndoneziä räsmiläre ildä ülüçelär sanı 100 meñgä citäçäk dip farazlıy. Bu qara isemlektä ikençe urında Şri Lanka, anda 28 meñ yarım keşe hälak bulğan dip isäplänä. Pänceşämbe könne BMO general sekretare Kofi Annan, 5 millionğa yaqın keşene yäşär urınsız qaldırğan tsunaminı "global faciğa" dip atadı: "Faciğa näticälären beterü öçen böten köçne tuplarğa tieşbez. Här keşe añlıydır, moña bik küp aqça köç häm waqıt kiräk bulaçaq." dide Kofi Annan. Älegä ziyan kürgän illärgä 500 million dollar bireläçäge mäğlüm. İndoneziä räsmiläre 6nçı ğınwar könne ütäçäk tsunamidan soñğı wazğiätkä bağışlanğan xalıqara cıyınğa tağın üz xisapların äzerlärgä cıyına. Könyaq Aziä illärendä bulğan tsunami – 1976nçı yılda Qıtayda, Tangshanda bulğan cir teträwdän soñ iñ küp keşeneñ ğömeren özgän tabiğat qazası dip sanala. Töbäktäge ütä almaslıq yullar, küperlärneñ cimerelgän buluı häm yağulıq citmäwe säbäple ziyan kürgän cirlärgä yardäm barıp citmi. Kiçä İndoneziäneñ tönyağındağı Medan şähärenä amerikan yardäm oçqıçı töşkän. Ämma Açeh provinsiäseneñ başqalası Banda şähärenä ul yardäm 16 säğattän soñ ğına barıp citkän. BMOnıñ UNİCEF oyışmasınıñ İndoneziädäge wäkile John Budd yardäm çaraları turında kiçä menä şularnı belderde: "Bez 4 tonnağa yaqın medetsina kiräk-yaraqları kiterdek. Bu äyberlär cir teträw bulğan töbäktä 200 meñ keşegä ike atnağa citäçäk. Yardämgä eçär su, berençe yardäm kürsätü cihazları, malyariağa qarşı darular häm başqa şundıy kiräk-yaraqlar kergän" dide UNİCEFnıñ yardäm wäkile. Amerika Quşma Ştatlarındağı Maryland Universitetınıñ medetsina professorı Robert Edelman, "sanitar normalar bik tübän buluı arqasında, xällär alğa taba naçarlanırğa mömkin," dip belderde.
XS
SM
MD
LG