Accessibility links

якшәмбе, 11 декабрь 2016, Казан вакыты 16:52

Mintimer Şäymiev uzğan yılğa näticälär yasıy


Tatarstanda da yaña yıl kanikulları bara. 6 ğinwarğa, ä bik küplär 10 ğinwarğa qädär eşkä barmıy. Yalqawlar häm baylar, älbättä, quana. Kem çit ilgä barıp, tipterep qayta. Kemder öyennän çıqmıyça ğına baş tözätkäläp, räxätlänä. Bala-çağa bu könnärdä qışqı kanikullarğa çığıp, çana şuğanda, ölkännär dä şundıy räxätlekkä künegä. Kanikullarğa mönäsäbät törleçä. Allağa şöker, Tatarstanda äle ber törle genä fikerlärgä digän tärtip urnaştırılmağan. Bik küplär kanikulğa çıqqaç, yal itärgä dip küzdän yuğalğanda, qänäğätsezlek belderüçelär dä xätsez ikän.

İkençe yaqtan qarağanda, aqçası bulğannar häm bulmağannar öçen, böten cämğiät öçen möhim ber şöğel' bar. Uzğan yılnıñ iñ zur yañalıqlarına yomğaq yasaw, möhimräk waqiğalarnı saylap alu. Tawıq töşenä tarı kerä, digän kebek, nindi waqiğanı saylıysıñ, şul sineñ kem ikänlegeñne häm niätläreñne kürsätä. Azatlıq xäbärçeläre törle töbäklärdäge iñ möhim waqiğalarnı radio aşa söyli başladı inde. Ä Tatarstannıñ waqiğaların saylaw qıyınraq häm xikmätleräk. Çönki bik küp bit alar tarixta qalırlıq xällär.

Tatarstan prezidentı Mintimer Şäymiev üzeneñ Yaña yıl möräcäğätendä menä nindi waqiğalarğa iğtibar itä. Rusiä prezidentın häm respublika Däwlät Sovetı deputatların saylaw, Beslan faciğäse, Tuzğan toraq programması buyınça 50 meñgä yaqın ğailägä fatir birü, sotsial' ipoteka programmasın başlap cibärü, neft' ximiäse, tözeleş, maşina tözü, energetika tarmaqların totrıqlı üsterü, awıl xucalığında mul uñışqa ireşü. Äye, säyäsät tügel, iqtisat berençe urında. 13 sentäberdä töbäk citäkçelären bilgeläw, respublika qanunnarın botarlaw turında prezident bäyräm kiçendä iskä almadı.

Xäyer, monı härkem belä inde. Qayber qıyın xällärne tağın ber tapqır iskä almasañ da bula kebek. Respublika citäkçese kübräk yaña başlanğan 2005 yıl turında söyli. Watan suğışında ciñügä 60 yıl, Qazannıñ meñyıllığı, cirle üzidarä orğannarı oyıştırıluı. Bu inde prezident orientirları.

Rimzil Wäli

XS
SM
MD
LG