Yaña yılnıñ berençe könnäre taşlamalarnıñ beterelüe belän istä qala. Xäzer inde pensionerlar, militsionerlar häm başqalar şähär transportında buşlay yörmi, ä xökümät birgän aqçağa bilet ala. Ğinwarnıñ berençe könnärendä transport tuqtalışında äbi-säbi häm babaylarnıñ sanı kimegän ide. Xäzer inde qaya barğanıñnı uylap, küpme tüläyäçägeñne sanap qına yulğa çığasıñ.
Yaña yılnıñ tağın ber bilgese – ätäç. Uyınçıq satuçılar ätäç töşkän räsemnär, uyınçıqlar satıp, zur aqça qazandı. Tatarlar ätäç simvolın yaratalar. Ul suğış çuqmarı ğına tügel, ä qıyulıq, censi buldıqlılıq simvolı da bulıp tora. Qayberäwlär ber-bersenä tere ätäç tä büläk itte. Qazannıñ iñ zatlı restorannarnıñ berse - Timerxanda xökümät apparatı Yaña yılnı qarşılaw kiçäsen ütkärgän. Timerxannıñ qunaqçıl xucaları prem'yer-ministrğa respublikanıñ iñ näselle, iñ şäp ätäçne saylap alıp, Röstäm Miñnexanovqa itärgä bulğannar. Avtomobil' yarışlarında häm iqtisat, finans eşlärendä ätäçlek kürsätkän prem'yer-ministr tere büläkne başqa urınğa cibärergä ämer birgän. Ätäçneñ yazmışın kiläçäktä öyränep sezgä söylärbez. Ä xäzergä prem'yer ätäçeneñ süräten Azatlıq radiosınıñ İnternet säxifäsendä kürä alasız.
Prem'yer Miñnexanov digännän, KamAZ avtomobilläre bıyıl da Telefonika-Daqar-2005 yarışına kitte. Yäkşämbe könne Firdäwes Käbirov citäkçelegendäge ekipajnıñ ikençe urında baruı turında xäbär itelde.
Rimzil Wäli
