Accessibility links

дүшәмбе, 5 декабрь 2016, Казан вакыты 13:34

Xorvatiädä ütkän prezident saylawlarında ğämäldäge prezident Stipe Mesiç berençe turda uq ciñä yazdı


Räsmi näticälärgä qarağanda, yäkşämbedä ütkän saylawlarda ğämäldäge prezident Stipe Mesiç tawışlarnıñ küpçelegen cıysa da, berençe turda uq ciñü yawlıy almağan. Tağın ike atnadan Mesiç häm ikençe urınğa çıqqan Xristian Demokratlar Berlege namzäte Jadranka Kosor arasında ikençe tur saylawlar ütäçäk. Belgeçlär, ul saylawlarda Mesiç ciñep çığıp, ilne Yevropa Berlegenä kerügä äzerli başlar dip farazlıy.

Yäkşämbedä Xorvatiädä ütkän saylawlarda prezident urınına barlığı 13 namzät däwğa itte. Ğämäldäge prezident Stipe Mesiçqa berençe turda uq ciñü öçen ni barı 1 protsent citmägän. Räsmi näticälärgä qarağanda ul tawışlarnıñ 49 protsentın cıyğan. İkençe urında 20 protsent çaması tawış belän xakimiättäge Xristian Demokratlar Berlege nazmäte Jadranka Kosor.

Şulay itep, ike atnadan, 16 Ğinwarda, şuşı ike namzät arasında ikençe tur saylawlar ütäçäk. Äytergä kiräk, alar ikese dä Könbatış qaraşlı. Belgeçlär, bu, 2009 yılda Yevropa Berlegenä kerergä cıyınğan Xorvatiägä faydağa, di, çönki alar saylaw aldı kampaniäse barışında bu mäsälädä ber-bersen uzdırırğa tırışaçaq. Alay da, qayber küzätüçelär, Mesiç''nıñ ciñüe Xorvatiägä, Xristian Demokratlar Berlegeneñ, bigräk tä prezident Franjo Tudjman çorında xas bulğan, ütä-millätçelegennän arınırğa yärdäm itäçäk, digän fikerdä. Düşämbedä, Stipe Mesiç üzen ilneñ Yevropa Berlegenä kerüen täemin itäçäk iñ yaxşı citäkçe dip atadı:

Audio (Stipe Mesiç)

"İkençe turda bez Xorvatiäneñ qayda barasın xäl itäbez – alğa, 21 ğasırğamı, ällä artqamı. Min 21 ğasır häm zamança, layıqlı, bäysez Xorvatiä täqdim itäm."

Jadranka Kosor isä, xalıq mänfägätlären säyäsättän östenräk quyarğa, Yervropa Berlegenä kergändä Xorvatiäneñ mänfägätlären saqlarğa wäğdä itte:

Audio (Jadranka Kosor)

"Berençe süzem şul - minem öçen xalıq säyäsättän möhimräk. Minemçä, min monı isbatladım inde. İkençese – ikençe turda ciñgän oçraqta min Xorvatiäneñ mänfäğätlären saqlawçı häre keşeneñ köçle häm ğädel prezidentı bulaçaqmın."

Şulay da, Jadranka xanımnıñ ikençe turda ciñä aluına ışanuçılar yuq diärlek. Zamanında Mesiçnıñ tışqı säyäsät kiñäşçese bulğan Tomislav Jakiç bolay di:

Audio (Tomislav Jakiç)

"Xäzerge şartlarda, berär törle surpiz-fälän bulmasa, ikençe turda Mesiç ciñäçäk. Berençe turda anıñ köndäşläre barısı bergä anıñ qädäre tawış cıya almadı."

Zagrebtağı säyäsi küzätüçelär kiçäge saylawlarda amerikan eşquarı Boris Miksiçnıñ öçençe urınğa çığuına iğtibar itä. Çığışı belän xorvat, Quşma Ştatlarda küp millionlı käsebe bulğan Miksiç, saylaw aldı kompaniäsen "min yaña keşe, iñ saf prezident bulaçaqmın" digän şiğär astında alıp bardı häm tawışlarnıñ 17.8 protsentın qazandı. Belgeçlär fikerençä, anıñ saylawçılarınıñ kübese ikençe turda tawışların Jadranka Kosorğa biräçäk, ämmä bu tawışlar bareber Stiçe Mesiçnı ciñü öçen citmiäçäk.

-Ali Gilmi
XS
SM
MD
LG