İndoneziäneñ, tsunamida iñ küp ziyan kürgän Açeh provinsiäsendä, "CARE" oyışması wäkilläre süzlärenä qarağanda yardäm eşläre "bik awır şartlarda" bara.
Aziädä bulğan köçle tsunamidan soñ 8 kön uzdı. Hälak bulğan 144 meñ keşeneñ 3tän 2 öleşe – näq şuşı tönyaq Sumatra töbägendä. Tabiğat qazasında isän qalğannarnıñ berse, Abu Bakar, aşarğa alırğa çirat torğanda, yardäm äle ber tärtipkä salınmağan, dip söyläde: "Bezne aşatqan öçen räxmät, ämma bu ozaqqa citmiäçäk. Bezgä döge, may, başqa törle rizıq ta kiräk," dide çiratta toruçılarnıñ berse.
Hawa alannarında cıyılğan yardäm äkrenläp tieşle urınnarğa tarala başladı. Ämma äyberlärne ziyan kürgän töbäklärgä alıp baru bik awır, yullar häm transport yuq. Şri Lankada da şul uq xäl dip xäbär itelä.
BMOnıñ Humanitar Eşlärne Koordinasiäläw öçen cawaplı wäkile Elisabeth Byrs, oyışmağa äle tarixta bulmağan qısqa waqıt eçendä million yarım dollar aqça cıyıldı, dip xäbär itte. Ğadättä bu külämdä humanitar yardämne Berläşkän Millätlär Oyışması ber yılda ala.
Bügen Tailandqa amerikan däwlät sekretare Colin Powell kilde. Tsunamidan soñğı wazğiät belän tanışu öçen kilgän amerikan wäkilläre arasında şulay uq Florida ştatı gubernatorı, prezident George Bush'nıñ ber tuğanı Jeb Bush ta bar. Florida ştatında dawıllar yış bula, şuña da Bush'nıñ mondıy wazğiättä eş itü täcribäse bar. Amerikan wäkilçelege pänceşämbe könne açılaçaq xalıqara cıyında da qatnaşaçaq.
Bügen Aq Yortta Amerika Quşma Ştatları prezidentı George Bush amerikan xalqına tsunami faciğasendä ziyan kürgännärgä quldan kilgän qadär yardäm itergä çaqırıp möräcäğät itte: "Bez ükeneç belderäbez, häm ziyan kürüçelärgä çın küñeldän yardäm itergä telibez. Amerika yumartlığı ul – xökümät birgän açqalar ğına tügel, ul amerikan xalqınıñ kiñ küñele, tsunami bulğannan birle ğadi amerikan keşeläre töbäkkä millionlağan dollar cibärde" dide George Bush. Amerikan xökümäte inde 300 million dollar biräçägen xäbär itkän ide.
