Accessibility links

Кайнар хәбәр

Yekaterinburda tatarça çırşı bäyräme ütte


Sverdlov ölkäsendä yäşäwçe tatar balaları öçen bu könnärdä bik küñelle waqiğa bulıp uzdı – niçä yıllardan soñ berençe tapqır ölkä külämendä tatarça çırşı bäyräme oyıştırıldı. Bäyrämdä ölkäbezneñ törle poçmaqlarınnan kilgän 150 tatar balası qatnaştı. Çırşı bäyräme Tatarstannıñ Uraldağı daimi wäkillege häm Milli Media-Xolding citäkçeläre köçe belän oyıştırıldı. Bäyrämne Tatarstannıñ Uraldağı daimi wäkile Rawil Bikbov açıp cibärde. Yaña yıl bäyräme belän qotlap, ul balalarnı tuğan telne, tuğan millätne yaratırğa çaqırdı. Çırşı bäyräme törle uyınnarğa, äkiät personajlarğa, cır häm iyüllärgä bik bay bulıp uzdı. Yekaterinburg malayı öç yäşlek Röstäm Sadriev xätta Qış babay belän tatarça isänläşergä dä öyrände. Ğomumän, kiçä balalar öçen bik küñelle bulıp uzdı. Balalar üzläre bik matur konsert ta äzerläp kilgännär ide. Tamaşaçılar Yekaterinburgtan Liana Qotlıyıwa, Ksyuşa Mönirovalarnıñ cırlawın, Ärtä rayonınıñ Äceğol awılınnan birle kilgän balalarnıñ çığışın bik yaratıp qabul ittelär. Äceğol balaları üzläre dä, alarnı alıp kilgän, “Kübäläk” balalar ansamble citäkçese Ğäliä apaları Zäynullina da bäyrämne bik oşatuların äytep, iksez-çiksez räxmät belderdelär. Çırşı bäyrämendä Milli Media-Xolding citäkçeläre “Sälätle balalar” programmasında qatnaşuçı balalarnı bilgeläp üttelär, başqalarnı da alarğa tiñläşergä çaqırdılar. Bäyräm “Kügärçen” ürnäk balalar ansamble çığışı belän tämamlandı.

Fäwiä Safiullina, Yekaterinburg
XS
SM
MD
LG