3 ğinwar könne, Kreml.org digän internet säxifädä, 1nçe federal kanalnıñ säyäsi küzätüçe Mixail Leontyevnıñ mäqäläse basılıp çıqtı. Anıñ fikerençä, Rusiäneñ xäzerge administrativ büleneşe bäxäsle häm tabiği tügel. Leontyev äfände uylawınça, federalizm ul Rusiägä ber qayçan da xas bulmağan häm uylap çığarılğan närsä.
Tatarstan xalıq deputatı häm parlamentnıñ komissiä başlığı, şağir häm cämäğät eşleklese Robet Miñnullin xäbärçe Mixail Leontyev belän bäxäskä kerä. « Patşalarnıñ elekke zamanda şutları bulğan, alar xaqiqätne berençe äytep birgän. Xäzer dä andıy keçelär bar, şul uq Jirinovskiy, Leontyev, Rogozin häm başqalar. Alar xalıqnı äzerli. Çınlıqta federalizm Rusiädä patşa zamanında da, Sovetlar waqıtında da bulğan. Rusiä kebek zur ildä, federalizmnan başqa bulmıy. Yelsin kitkännän soñ, Mäskäw bu mäs’älädä däşmi tora. Bu yünnegä tügel, alar unitar däwlät tözergä mataşa. Ämma, minemçä bu eş barıp çıqmas.»1nçe federal kanal xäbärçese Mixail Leontyevnıñ çığışında, tağın töbäklärne berläşterü, zuraytu turında da süz bardı. Räsmi mäğlümat çarasında säyäsi küzätüçe bulıp eşläwçe bu jurnalist, töbäk citäkçelären östän bilgeläw, Rusiäneñ tözeleşen üzgärtergä yöz totqan citdi reformanıñ berençe basqıçı, töbäklärne Mäskäwdän idärä itä torğan xälğä kitergänçe zuraytırlar, dip yaza. Tatarstan xalıq deputatı Robert Minnulinnıñ bu xaqta uylanğanı bar. Tatarstan häm Başqortstan başqa töbäklärgä quşıluğa moxtac tügel. Bezneñ töbäk zurayğan oçraqta, Tatarstannı Başqortstan belän tügel, ä başqa millät keşeläre yäşägän häm sotsial-iqtisadıy yaqtan arta qalğan töbäklär belän quşlarlar, dip farazlıy ul. Berençedän bu tatarlarnıñ sanı kimäyäçägenä kiteräçäk häm iqtisadı yaqtan da faydağa bulmayaçaq, dip sanıy Robert Miñnullin.
Bikä Timerova.
