Accessibility links

якшәмбе, 11 декабрь 2016, Казан вакыты 09:12

Tsunamida hälak bulğannarnıñ sanı artırğa mömkin


BMO nıñ yardäm taratu koordinatorı Jan Egeland, Könyaqkönçığış Aziä illärendä bulğan tsunamida hälak bulğannarnıñ sanı 150 meñgä citte, yaqın aralarda tağın berniçä meñgä artırğa mömkin, dip belderde. Yevropa Berlege illärendä bügen köndezge 12dä 3 minutqa xäräkät tuqtadı. Brüsseldä tsunami qorbannarın çirkäw tawışları belän iskä aldılar. İndoneziäneñ iñ küp ziyan kürgän Banda Açeh provinsiäsendä bügen bulıp kitkän amerikan däwlät sekretare Colin Powell, ğömerendä dä mondıy äyber kürgäne bulmağanı turında söyläp birde: "Ğömeremdä mondıy äyberlär kürgänem bulmadı. Bolarnı kürgäç, töbäkne niçek itep ayaqqa bastıru, keşelärneñ yortların, tormışların häm eşlären yañadan niçek itep tözekländer. kiräklegen yaxşıraq añladım," dide Powell. Germaniä kanslerı Gerhard Şröder, 3-5 yıl eçendä ziyan kürgän töbäklärgä Germaniä 500 million euro yağni 662 million dollar biräçäk, dip xäbär itte. Älegä Germaniä iñ küp aqça birgän il bulıp tora. Yaponiä 500 million häm Amerika Quşma Ştatları 350 million dollar biräçäklären belderde. Tsunami'da Germaniäneñ watandaşı hälak bulğan, meñnän artıq almannıñ qayda bulğanı bilgesez. BMO räsmiläre – töbäktä ata-anasız qalğan balalarnıñ bala satu häm qollıq qorbannarına äylänü ixtimalı turında kisätä. Keşelär belän säwdä itüçe törkemnär – tsunamidan soñğı wazğiättän faydalanıp balalarnı urlap alıp kitä digän älegä raslanmağan mäğlümatlär bar. İndoneziä räsmiläre polisiägä – balalarnı saqlarğa häm ildän çığarmas öçen östämä çaralar kürergä digän kürsätmä birgän.

XS
SM
MD
LG