Accessibility links

Кайнар хәбәр

Tatarstanda benzinğa bäylär töşte


Yaña yıl bäyrämnäre tämamlanuğa taba bara, xalıq aqrınlap bulsa da ğädäti tormışqa qayta. Dimäk, bäyrämnär waqıtında onıtılıp torğan tormışnıñ matdi yağı, aqça mäs’äläse dä yañadan aktual’läşä. Citmäsä, yaña yıl aldınnan küp itep alınğan azıq-tölek betep bara. 2005 yıl tatarstanlılar öçen genä tügel, ä bar rusiälelär öçen dä bu ölkädä şaqtıy ğına yañalıq alıp kilde. Berençe çiratta inde, älbättä, soñğı aralarda bik küp söylängän taşlamalarnı aqçalata tüläwlärgä alıştıru. Älege yañarışnıñ berençe cimeşlären pensionerlar inde 1 ğinwardan ük tatıy başladı. Xäzer şähär transportında yörüçe härkem aqça tülärgä tieş. Elek taşlamalarğa iä bulğannar, bigräk tä, äbi-babaylar, olı keşelär inde zarlana da başladılar. Kemder äle haman iske ğädät buyınça aqça tülärgä dä telämi. Aqçalata tüläwne äle birep tä ölgermädelär, ä yörgän öçen inde xäzer ük tülärgä kiräk. Citmäsä äle, şähär transportında yörü öçen bäyä şuşı könnärdä tağın da artırğa tieş, digän süzlär yöri. Ğinwarnıñ ikençe yartısında, bäyrämnär betkäç, tramvay-trolleybuslarda tüläwlär 5 sumnan 7 sumğa qädär menäçäk, ä marşrutkalarğa utırıp barğan öçen 10 sumnan 13 sumğa qädär çığarıp birergä kiräk bulaçaq.

Fatirlarğa kommunal’ xezmät kürsätkän öçen dä bäyälär näq menä 2005 yıl başınnan artaçaq. Xäyer, här fatirdan tüläw küpmegä arta, xezmät kürsätü öçen tögäl küpme tülärgä kiräk bulır – monı tatarstanlılar äle ikençe ay başında, alarğa yaña xisaplarnı kitergäç kenä beläçäk. Läkin bu xisaplardağı sannarnıñ 2004 yıl belän çağıştırğanda şaqtıy zur buluı, ä xezmät xaqı külämeneñ şul uq däräcädä qaluı küplärne xökümättän matdi yärdäm, toraq-kommunal tüläwlärgä subsidiä alırğa möräcäğät itärgä mäcbürläde. Bügenge köndä respublikanıñ sotsial’ yärdäm idärälärenä 64 meñ tatarstanlı möräcäğät itkän. Elek taşlamalardan qullanuçılardan tış bu subsidiälär kommunal’ xezmätlär ğailäneñ barı keremeneñ 22 protsentınnan da artığın täşkil itkän oçraqta tülänergä tieş.

Xäyer, aqça, bäyälär, finans mäs’älälärendä quanıçlıraq yañalıqlar da bar. Yaña yıl bäyräme aldınnan ğına Mintimer Şäymiev, taşlamalar öçen respublika byudjetınnan bireläçäk aqçalata tüläwlärneñ küläme aldan bilgelängännän qarağanda ike märtäbägä artığraq bulaçaq, dip belderde. Şuşı könnärdä genä avtomobil’ yörtüçelär dä çın-çınlap Yaña yıl moğcizasına tap buldılar. İnde qayçannan birle üsä genä barğan benzin bäyäläre kinät kenä 60-70 tiengä töşep kitte. Belgeçlär monı benzinğa küpläp satıp alu bäyäse töşü belän aşlatalar.

Gölnaz İlgizär

XS
SM
MD
LG