İndoneziä başqalasında 20dän artıq il wäkilläre qatnaşında könyaq Aziädä bulğan köçle tsunami näticälären beterü çaralarına bağışlanğan xalıqara cıyın uzdı. Dönya citäkçeläre ziyan kürgän töbäkkä 4 milliard dollar wağdä itelüen xupladı, aqçalarnı kiçekmästän cibärergä çaqırdı. Şulay uq tsunaminı aldan kisätü sistemasın buldıru plannarı turında da süz bardı.
İndoneziä prezidentı Susilo Bambang Yudhoyono, berläşergä çaqırdı: "Tözekländerü eşendä kiçekterülär bulmasın. Bu – qısqa möddätle maqsat. Ozın mäddättä isä bez keşelärne häm cämğiätlärne ayaqqa bastıru mäs'äläse aldında qaldıq. İnfrastruktura qabat tözelergä, yäşäw çığanaqları qaytırılırğa tieş" dide İndoneziä prezidentı.
BMO general sekretare Kofi Annan, tsunamida hälak bulğannarnıñ sanı tağın artmasın öçen, töbäkkä yardäm itergä, isän qalğannarnıñ açlıq häm törle çirlärdän ülüenä citkermäskä çaqırdı.
