Accessibility links

сишәмбе, 6 декабрь 2016, Казан вакыты 08:50

Cakartada tabiğät qazası kiçergän Könyaq Aziä illärenä yardäm kürsätü oçraşuı uzdı


Pänceşämbedä İndoneziä başqalası Cakartada 10 kön elek dulqın taşqınınnan zian kürgän Könyaq Aziä illären torğızu mäs''äläse tikşerelde - anda barlığı 26 il häm xalıqara oyışmalarnıñ ölkän wäkilläre qatnaşqan yuğarı däräcäle oçraşu üzdı. Bar dönya buylap älegä 4 milliard dollarlıq yardäm tuplandı, Cakarta oçraşuında şuşı aqçanı mömkin qädär tizräk hälakättän zian kürgän illärgä küçerü kiräklege turında äytelde. Moñardan tış anda dulqın taşqınnarı kilüe xaqında aldan xäbär itü sistemasın buldıru kiräklege dä kütärelde.

Cakarta oçraşuı Könyaq Aziä yarların yuwıp alğan dulqın taşqınında hälak buluçılarnı iskä alu, ber minutlıq tınlıq belän başlandı. Cıyınnı qazadan iñ zur zian kürgän häm oçraşunı üzendä qabul itkän İndoneziä prezidentı Susilo Bambang Yudhoyono açıp cibärde.

Audio, Susilo Bambang Yudhoyono

"Älegä qädär kürelmägän şuşı hälakätkä bezneñ cawap ta älegä qädär kürelmägän külämdä bulırğa tieş, şulay ğına bez keşelärneñ qazadan soñ kiçergän cäfaların häm integülären beterä alabız. Ülüçelär sanınıñ üsüenä inde yul quyılmasqa tieş" dip belderä İndoneziä prezidentı. Yardäm kürsätü eşendä bar dönyanıñ berläşüen BMO general'' sekretare Kofi Annan da maqtap telgä ala, inde äytelgänçä, bügenge köngä qaza kiçergän il wä töbäklärgä 4 milliard dollarğa yaqın aqçalata yardäm wäğdä itelde.

Audio, Kofi Annan

"Bar dönya bergä tuplandı, bez bergäläşep eşlibez. Şuşı kiñäşmädäge toyğılar da, minem törle il citäkçeläre belän ütkärgän fiker alışulardağı toyğılar da mine, bez eşne tieşle däräcädä alıp barabız häm qorbannar belän çın teläktäşlek bar, bez wäzğiatne üzgärtä alabız digän fikergä etärä" di Berläşkän Millätlär Oyışması general'' sekretare. Kofi Annan şulay uq dönya illären alğan yöklämälären waqıtında ütärgä, wäğdä itkän yardämne qaza töbäklärenä kiçektermi citkerergä öndäde. Anıñ süzlärenä qarağanda, qazadan zian kürgän 5 million keşeneñ aldağı 6 ay eçendä aşığıç humanitar ixtiacların qaplaw öçen genä yaqınça ber milliard dollar kiräk bulaçaq. Yaponiä Berläşkän Millätlärneñ şuşı öndämäsenä cawap yözennän üze wäğdä itkän 500 million dollarlıq yardämneñ yartısın inde mart azağına qädär ük biräçägen äytte. Yaponiädän tış qaza kiçergän töbäklärgä külämle yardäm kürsätü yöklämäsen Australiä dä aldı - bu il yaqınça 750 million dollar biräçägen belderde, ä Germaniä isä barlığı 500 million eurolıq öleş kertäçägen xäbär itte. Kansler Gerhard Schroeder Berlindä, yardäm itü qazanıñ berençel näticälärennän arınuğa bulışu belän genä çiklänmäskä tieş dip belderde.

Audio, Gerhard Schroeder

"Aşığıç yardämneñ möhim buluına qaramastan, ul ğına äle citärlek tügel. Min baştan uq Germaniädäge teläktäşlek xise urta mötdätle häm ozaq mötdätle yardäm belän bäylänergä tieşlegen añlatırğa tırışıp kildem. Şuña kürä dä german xökümäte barlığı 500 million euro bülep birü turında qarar qabul itte, şuşı aqça 3-5 yıl eçendä citkereleçäk" di german kanslerı Schroeder. Amerika Quşma Ştatları älegä 350 million dollar belän bulışaçağın äytä, moñardan tış amerikan xärbiläre inde bolay da üz qorabları wä boralaqları belän İndoneziäneñ häm Şri Lankanıñ qaza iñ zur zian kitergän töbäklärenä aşığıç yardäm kürsätü eşen alıp bara.

Kärim Kamal
XS
SM
MD
LG