Accessibility links

җомга, 9 декабрь 2016, Казан вакыты 10:44

«Tatnet» tapşıruı çığa başlawğa 1 yıl tuldı!


Bu könnärdä «Tatnet» tapşıruı keçkenä genä yubileynı bäyräm itä. Tatar internet saytlar, forumnar belän tanıştıruçı, internet birä torğan mömkinleklär turında söyläwçe tapşıruıbızğa 1 yıl tuldı. «Tatnet» internetta barğan waqiğalarnı yaqtırtıp kilde, internet forumnarda äytelgän fikerlär belän real tormıştağı tıñlawçılarnı da tanıştırıp bardıq, global çeltärdä oçrağan qızıqlı mäğlümat, şäxes, küreneşlär xaqında da ser saqlamadıq, tükmi-çäçmi «Azatlıq» tıñlawçılarına citkerep tordıq. Tapşırularıbıznıñ bersendä, UNESCO oyışmasınıñ informatizatsiä komissiäse başlanğıçı belän, Amerikadağı tellär laboratoriäse maxsus robotnı eşlätep cibärüe turında söylägän idek. Älege robot internetta qullanışta bulğan tellär sanın açıqlarğa tieş ide. Älege maşina 1 yıl buyı eşlärgä tieş. 2005 yılnıñ fevral ayında 1 yıl betä häm şul waqıtta, robot tuplağan mäğlümatlar belän kiñ cämäğätçelek tä tanışaçaq. Älege tellär laboratoriäse berençel näticälärne iğlan itte inde. Älegä robot internetnıñ küpçelek öleşe ingliz telendä söyläşä, digän näticä çığardı. Bezneñ «Tatnet» tapşıruı da, älegä robot sıman internetta ezläw, qızıqsınu, açıqlaw eşen başqara, ayırma şunda, meñlägän ingliz, urıs häm başqa telle säxifälär arasında tatar telen, tatar säxifälären häm millättäşlärebezne ezläw belän şöğellänä. Tatar internetı öçen 2004 yıl nindi buldı? Nindi yañalıqlar alıp kilde ? Bu xaqta tatar internetçıları arasında tanılğan keşe, berniçä internet proyekt xucası Azat Säyfetdinov belän söyläştek. Ul bolay cawap birde: «2004 yılda nindider zur üzgäreşlär Tatnetta bulmadı. Yaña saytlat barlıqqa kilde, qızıqlı proyektlar eşli başladı. Yaña tatar xat törkemnäre barlıqqa kilde. Ämma tatnet barıber, äkren üsä.»

Azat äfände tağın ayırım awıllarnıñ saytları barlıqqa kilä başlawın telgä aldı. Mäsälän, Tübän Novgorod ölkäsendäge Safacäy, Rıbişe awıllarınıñ üz internet säxifäläre bar. Tatarstandağı Molki awılınıñ da internet saytı bar, anı şuşı awıldan çıqqan häm awılın sağınıp yäşägän keşelär yasağan.



İsegezdä bulsa, «Tatnet» tapşırularnıñ iñ berençe çığarılışında, «Yıl tatarı» bäygese turında söylägän idek. İske yıl betep, yañası başlanğan waqıtta «Yıl tatarı» bäygesenä nämzätlär täqdim itü ğädäte bar ide. «Tatarskaya gazeta» nıñ forumında, bıyıl «Yıl tatarı» bäygese bulmasa qızğanıç bulır ide, digän yazu basılıp çıqtı. Häm şunnan soñ, añlatmalar bulmadı. Bäygeneñ bulu, yäki bulmawı turında soraw birep, bäygene oyıştıruçısı İrek Bikininğa xat yazdıq. Ul bolay cawap birde«

«Konkurs buyınça elegä soñğı qarar çığarmadıq.Uzgan yıldağı kebek ğadi sayt eshlärğä telemes idek, çönki biik küp waqıt yuğaltıp, anı saqlap torırğa turı kilde. Bik kup azğın xalıq internetta. Bolay keşe belän söyiseñ normal keşeğä oşıy. Annan soñ bağasın, ul keşe üzeneñ kandidatı öçen tawışlar tutıra:((((»

İrek Bikinin yazğança, bu 2005 yılda bäygene oyıştıruçılar, başqa sistema nigezendä eşlärgä bulğan. Anıñ öçen yaña komputor programmasın yazam. Bu eş ğinwlarda bulmasa, fevral’dä tämamlanaçaq, dip wäğdä itte İrek Bikinnin. Dimäk «Yıl tatarı-2004» bäygese bıyel bulaçaq. Bäygegä täqdim itelä torğan nämzätlär, säxifäneñ adressı, tawış birü tärtipläre internet forumnarda iğlan iteler. Bezgä bilgele bulğaç, bezdä «Tatnet» tapşıruında şunduq «Azatlıq» tıñlawlılarına xäbär itärbez.

Bikä Timerova.

XS
SM
MD
LG