Accessibility links

пәнҗешәмбе, 8 декабрь 2016, Казан вакыты 03:13

Kemder tamaşa qıla, ä kemder bozıqlıq suqmağında


Işanasızmı, yuqmı, 10 ğinwar Tatarstanda da, Rusiäneñ başqa töbäklärendä dä haman yal köne. Töp waqiğalar säyäsät yäki däwlät eşlärendä tügel, ä mädäniät, din häm könküreş, kriminal möxit belän bäyle. Qazan telekompaniäläreneñ berse soñğı könnärdä eçkeçelek iänäge-“белая горячка” digän oçraqnıñ kübäyep kitüe turında xäbär ite. Bu qädär bäyräm itkändä, mondıy xällär dä ğäcäpländermi. Ä başqaça, yäğni ayıq aqıl belän bäyräm, yal itü ğörefe älegä taralıp citmägän.

Az bulsa da, izge yulda yörüçelär dä bar. Düşämbe könne Qazannan Ufağa, annarı Citdägä baruçı oçqıç yulğa çıqtı. 286 möselman nigezdä İdel-Ural, Qazan-Ufa yaqlarınnan kilgän keşelär Qorban bäyrämen Söğüd Gäräpstanında qarşılayaçaq. Bıyıl barlığı Qazan aşa Xacğa baruçılarnıñ sanı 500дән artıp kitte. Bu uzğan yılğa qarağanda 2.5 tapqırğa artığraq. İntertat.ru elektron gäciteneñ xäbärenä qarağanda, Qazan aşa Xacğa barırğa Krasnoyarski, Novosibirski, Samar, Rostov, tömän, Ufa häm başqa qalalardan da mosafirlar tabılğan. Xacğa kitüçelär belän Qazan hawa mäydanında Tatarstan Diniä näzaräte räise Ğosman İsxaqi oçraştı. Bu säyäxätne soñğı yıllarda tanılıp kilüçe İdel-Xac programması buyınça oyıştırıla.

Bu könnärdä Qibla, ruxi azıq häm tamaşa ezläw härqayda oçrıy. Düşämbe könne Tatarstan - Yaña ğasır televidenieseneñ irtänge efirında siräk kilä torğan qunaqlar buldı. Bars-media kompaniäseneñ citäkçese Marat Gäräev häm Tatarstannıñ xalıq artistı Salawat Fätxetdinov kilgän idelär. Ämma studiädä Salawatnıñ näq şuşı könne tuğan köne buluğa iğtibar itelmäde. Qunaqlar 12 ğinwarda Piramida zalında başlana torğan Tatar cırı festivale turındağı sorawlarğa cawap birdelär. Soñğı gala-konsertqa bilet bäyäse 2200-2800 sum bulsa da, alarnı tabu inde mömkin tügel. Bu kiçtä tamaşaçılar östäl artında utırıp, festival' lawreatların tamaşa qılaçaq. Ä başqa könnärdä uzğan yıllardağı lawreatlar häm estrada säxnäse veterannarınıñ retro konsertı bulaçaq. Uzğan yıldan ayırmalı bularaq, älege festival'neñ konsertları televidenie aşa kürsätelmäyäçäk. Barı tik ber yıldan soñ ğına ayırım çığışlarnıñ yazması videokassetalarda satılaçaq. Şulay itep, iñ tanılğan estrada yoldızları Piramida nurlarında yözärgä äzerlänä. Şul uq waqıtta, klassik muzıka, xalıq icatı yoldızların tuplawçı bäyrämgä, İlham Şakirov isemendäge festival'gä äzerlek tä däwam itä.

XS
SM
MD
LG