Accessibility links

җомга, 9 декабрь 2016, Казан вакыты 01:12

Rusiä Qara diñgezdä Gruziä belän parom bäyläneşe açmaqçı


Gruziä xakimiatenä xäzerge prezident Mixail Saakaşvili kigännän birle Tbilisineñ Mäskäw belän araları şaqtıy kierenke bulıp qalsa da, yaqlar iqtisadi xezmättäşlekne yañartu tırışlıqların yasıy - Gruziägä ike könlek säfär belän Rusiäneñ transport ministrı İgor'' Levitin kilde. Şuşı ike il xäzer Gruziäneñ Poti häm Rusiäneñ Kavkaz portları arasında timer yul paromı açarğa äzerlänä.

Düşämbedä Tbilisigä kilü belän Rusiäneñ transport ministrı İgor'' Levitin üz säfäre barışında öç kileşügä qul quyarğa cıyınuın xäbär itte.

Audio, İgor'' Levitin

"Bez bügen öç dokument imzalayaçabız - parom kiçüe, yöklär taşu qağidäläre häm waqıtlıça qullanu qağidäläre turında. Şuşı waqıtlı qağidälär, timer yullarında yöklär taşuçı bar illär qatnaşında fivral ayında uzaçaq oçraşuğa qädär ğämäldä bulaçaq" di Rusiä transport ministrı. Paromnı yaqlar Gruziäneñ Poti häm Rusiäneñ Kavkaz portları arasında cibärmäkçe. Aleksi Aleksişvili, Gruziäneñ iqtisadi täräqqiat ministrı süzlärenä qarağanda, şuşı diñgez bäyläneşe inde 10 kön eçendä eşli başlarğa tieş. Kavkaz portı Kerç buğazınıñ Rusiä yarında urnaşqan häm ul nigezdä neft wä aşlamalar çığaru öçen qullanıla. Düşämbe kileşüläre Rusiä belän Gruziä arasında turıdan-turı säwdä bäyläneşläre urnaştıruğa köçle etärgeç birä. Moñardan tış Poti-Kavkaz parom bäyläneşe Ärmänstan, Azärbaycan häm Üzäk Aziädäge Törkmänstan wä Qazaqstan belän dä elemtälärne nığıtuğa yardäm itäçäk. Şulay uq Tbilisigä kilgän Andranik Manukyan, Ärmänstannıñ transport ministrı, äle yäkşämbedä ük yaña parom açılunıñ üz ilenä faydası turında bolay digän ide:

Audio, Andranik Manukyan

"İqtisadi yaqtan qarağanda, bu bik tä faydalı. Bäyläneş şaqtıy qısqa, bez älegä qädär Odessa yanındağı İliçevski portın qullana idek, ä ul yıraq. Poti belän Kavkaz arası qısqa. Ä ikençedän, Ärmänstan, Gruziä häm Azärbaycan xäzer Rusiä belän turıdan-turı bäyle bulaçaq" dip añlata yaña paromnıñ uñaylığın Ärmänstannıñ transport ministrı. Manukyan süzlärenä qarağanda, bäyläneş ärmän malların taşu bäyäsen 30 protsentqa kimetäçäk. Monı ul düşämbedä radiobızğa belderde:

Audio, Andranik Manukyan

Poti-Kavkaz paromı Ärmänstanğa Rusiä häm BDB-däge başqa illär belän säwdäsen arttıruğa bulışaçaq dip isäpli ministr Manukyan. Rusiä isä Poti belän Kavkaz portları arasında parom bäyläneşen açunı, bar könyaq Kavkaz töbägendä timer yul xäräkäten yañartunıñ ber öleşe itep kürä. Rusiä transport ministrı üzeneñ şuşı planı turında uzğan noyäbr ayında beldergän ide. Moñardan tış Mäskäw timer yul xäräkäten Tbilisi belän Suxum arasında da torğızu xaqında söyläşergä äzer buluın äytä. Yänä İgor'' Levitin:

Audio, İgor'' Levitin

"Bez noyäbrdä imzalağan berketmädä ike mäs''älä bar ide, berençese parom bäyläneşen açu turında, anısın bez bügen imzalayaçaqbız. Ä ikençese xäräkätne yañartu. Bez äle haman da Suxumnı İnguri yılğasındağı gruzin-abxaz çige belän totaştırğan öleşen tikşeräbez, anda haman da küper yuq" di İgor'' Levitin. Şuşı mäs''äläne ul Gruziäneñ premyer-ministrı Zurab Jvaniä häm däwlät ministrı Kaxa Benukidze belän tikşeräçäk.

Kärim Kamal
XS
SM
MD
LG