Britaniä salqanu ministrı Geof Hoon Britaniä Ğiraqqa östämä 400 xärbi cibäräçäk dip belderde.
Britaniä parlamentında çığış yasap Hoon bu törkem anda çiklängän waqıtqa ğına cibärelä dide.
Bu törkem kilgännän soñ Ğiraqta barlıq britan xärbiläre sanı 9 meñläp bulaçaq. Alarnıñ küpçelege könyaqtağı Basra şähärendä urnaşqan.
Ğisyançılar Bağdad politsiäse başlığınıñ urınbasarın häm anıñ şulay uq politsiädä eşläwçe ulın atıp üterde
Ber intixarçı Bağdadtağı politsiä üzägendä bomba şartlatıp 4 politsiä xezmätkären üterde.
30-nçı ğinwarğa bilgelängän saylawlar yaqınlaşıp kilgändä qarşılıq küstätüçe ğisyançılar soñğı aylarda küpsanlı politsiä xezmätkärlären häm räsmilärne üterde.
Bağdadta yulğa quyılğan bomba şartlaw näticäsendä ber amerikan tankı saftan çıqtı, 2 amerikan soldatı hälak buldı.
Ğiraqnıñ küçeş çorı xökümäte belderüençä, Ğiraq häm AQŞ xärbiläre soñğı aradağı operatsiälär barışında il buylap, ğisyançılıqta şiklänelgän 147 keşene totqarlağan.
Ğiraqta şaqtıy tä'sirle bulğan Sönni ğölämälär berläşmäse AQŞ ilçelege räsmiläre belän oçraşıp yaqınlaşıp kilüçe saylawlar turında söyläşte.
Saylawlarğa boykot iğlan itärgä çaqırğan Ğölämälär berläşmäse, ägär dä AQŞ Ğiraqtan ğäskärlärne çığaru waqıtın bilgeläsä, boykot çaqıruın kire alunı täqdim itte. AQŞ ilçelege wäkile Bob Callahan ğäskärlärne çığaru waqıtın bilgeläw mömkin tügel dide.
