Accessibility links

сишәмбе, 6 декабрь 2016, Казан вакыты 08:51

Yaña fälästin prezidentın saylaw häm İzraildä yaña xökümät raslaw solıx öçen yaña mömkinleklär aça


Törle illärneñ başlıqları fälästin citäkçese itep saylanğan Mäxmüt Abbasnı şuşı uñışı belän qotlap, bu Yaqın Könçığıştağı solıx eşlärenä yaña ber etärgeç birer digän ömet belderä. Şul ömetlärne İzraildä yaña xökümät bilgelänüe häm anıñ Gazadan İzrail köçlären çığarunı däwam itü wäğdäse dä arttıra. Ämma ike yaqta da nizaqnı elekkeçä saqlap qaluğa xezmät itkän radikallar citärlek.

Märxüm Arafat tiräsendäge fälästin citäkçeläre arasında Mäxmüt Abbas inde küptännän urtalıq yul wäkile sanala ide. Yäkşämbedän alıp ul yaña fälästin citäkçese häm Abbas İzrail belän, Arafat çorında tuqtalıp qalğan solıx söyläşülären yañartunı wäğdä itä. Anıñ aldında ğomumän şaqtıy ğına eş tora, fälästin üzidaräse ministrı Säyeb Erekat, ğäräplär arasında Äbü Mazen iseme belän dä tanılğan Mäxmüt Abbasnıñ aldağı mäşäqätläre turında bolay di:

Audio, Säyeb Erekat

"Äbü Mazen xäzer, minemçä, dönyadağı iñ awır eşne başqara, burıçlar çınnan da iskitmäle zur. Fälästinlelär anıñ, qanun idaräsen häm ictimaği tärtipne urnaştıruğa, xaosnı tuqtatuğa, reformalarnı däwam itügä, rişwätçelek belän köräşügä yünälderelgän berençe 100 könen küzätep toraçaq" di fälästin üzidaräse ministrı Erekat. Abbasnı borçığan problemalar başında fälästin cirlärendä abruyı şaqtıy kiñ cäyelgän "Xämäs" häm başqa şundıy radikal'' törkemnär yoğıntısın kimetü mäs''äläse tora. Alar üzläre prezident saylawlarında qatnaşmadı häm xäzer, üz höcümnären, İzrail belän berär törle uñışqa tiz arada ireşelgän oçraqta ğına tuqtataçağın belderä. "Xämäs"neñ wäkile Mäxmüd äl-Zähär düşämbedä, törkem bernärsäne dä buşqa ğına birmi häm "uñmağan tırışlıqlar" belän qızıqsınmıy digän süzlär äytte. Näq şundıy uq ütä kisken qaraşlarnı yähüd yağında da kürep bula. Düşämbe könne anda xakimiatkä premyer Ariel Şaronnıñ yaña xökümäte kilde, ul üzenä alğan töp yöklämälärneñ berse itep Gaza sızığınnan İzrail köçlären çığarunı, anı fälästinlelärgä qaldırunı bilgelägän ide. Ämma ütä millätçe yähüd dairäläre xökümätneñ şuşı planına kisken qarşı çığa. İzrailneñ "Haarets" basması xezmätkäre Lili Galili radikallarnıñ ike yaqta da, İzrailneñ üzendä dä buluı xaqında bolay di:

Audio, Lili Galili

"Xäzerge mizgeldä härnärsä dä ike yaqtağı radikallar tarafınnan da yuqqa çığarıla ala. Äytik, İzrail xalqınıñ küpçelege belüegezçä, Gazadan kitüne yaqlıy, ämma şuña da qaramastan, moña qarşı buluçılar da bar, bigräk tä Gazadağı yähüd utarlarında yäşäwçelärneñ üzläre yağınnan. Alarnı yaqlaw isä İzrailneñ üzendä dä zur häm alar bezgä watandaşlar suğışı belän yanıy" di İzrailneñ "Haarets" basması xezmätkäre. Yähüd utarçıları xökümätne çınnan da, ilneñ qorallı köçlärendäge qayber ütä millätçel dairälär ğäskärlärne Gazadan çığaruğa qarşılıq yözennän fetnä kütäräçäk dip kisätkän ide. Küptän tügel genä İzrail xökümäte Gazada üz ämerlären ütäwdän baş tartqan rezervtağı 6 ofitsernı xezmättän çitläşterde. Oppozitsiädäge Xezmät partiäse yaqlawında tözelgän yaña xökümät töbäktä solıxğa ireşüne töp maqsatlarınnan berse itep kürä. Anda vitse-premyer urının alğan Şimon Peres, Xezmät partiäse citäkçese, sişämbedä İerusalimdä bolarnı äytte:

Audio, Şimon Peres

"Bu citärlek awırlıqlar kiçergän xökümät, ämma awırlıqlar häm solıx buluı, bolarnıñ ikese dä bulmawına qarağanda xäyerleräk" di elek uñçı premyer Şaronğa oppozitsiädä torğan, ä xäzer anıñ yaña xökümätenä kergän Xezmät partiäse citäkçese Peres. Mäxmüt Abbasnıñ yaña fälästin prezidentı itep saylanuı häm İzraildä solıxnı yaqlağan yaña xökümät tözelüe Yaqın Könçığışta İzrail-fälästin söyläşülären yañartu öçen dä yaña mömkinleklär tudıra.

Kärim Kamal
XS
SM
MD
LG