Accessibility links

якшәмбе, 4 декабрь 2016, Казан вакыты 03:05

Şimon Peres Azatlıq Radiosına birgän maxsus äñgämädä närsälär söyläde?


İzrael premyereneñ yaña urınbasarı veteran säyäsätçe Shimon Peres Azatlıq radiosına birgän ängämädä Fälästin citäkçelegendäge üzgäreşne qıyulandıruçı dip bäyäläsä, İran häm Süriäneñ töbäktä solıx urnaştıruda tiskäre täsire däwam itäçäk dip beldergän. Peres Süriäne terrorizm eksportında ğäyepläsä İrannı yaqın Könçığıştağı in zur qurqınıç dip atadı.

Nobel tınıçlıq büläge laureatı täcribäle säyäsätçe Shimon Peres 1948 yıldan, yäğni İzraelneñ oyışuınnan başlap ilneñ säyäsi tormışında rol uynıy. Düşämbe könne premyer A.Sharonnıñ xakimiättäge Likud Partiäse Peresneñ Xezmät partiäse belän koalitsion xökümät oyıştırdı. Bilgele bulğança şuluq könne Mäxmüd Abbas prezident saylawlarında ciñüçe itep iğlan itelde. Radiobıznıñ farsı bülege xabärçese Äxmäd Rafat sişämbe könne Tel Avivdä S.Peres belän ütkärgän intervyuda sonğı täräqiätlär turında soradı Anıñ berençe sorawı ni öçen Leyboristlar partiäse Sharonnıñ Likud partiäse belän koalitsion xökümät oyıştıruğa riza buldı. Peres cawabı:

Audio (Peres) Xökümätkä kerüebezneñ töp säbäbe Gazadan çigenüne garantiäläw.Yuq isä xökümät cimerereler häm yaña saylawlar ütkärergä tieş bulır idek.

Fälästinnär qatnaşmasa da İzrael çigenerme ide?

Audio (Peres) Fälästinnär belän söyläşülär başlarğa tieşbez, ber yaqlı ğına eşne ğämälgä quyıp bulmıy. İrtäme soñmı alar belän söyläşülär başlanırğa tieş.

Yasir Arafat fälästin problemasın çişüdä kirtä buldımı, yaña fälästin citäkçelege tınıçlıq öçen kübräk ömed tudıramı?

Audio (Peres) Arafatnıñ üleme zur üzgäreş, çönki Arafat terrorğa qarşı köräşergä äzer tügel ide. Ul terrornı etärdeme belmibez, ämma ul aña qarşı köräşmäde, yaña citäkçelek terror fälästnnär öçen zararlı häm ul tuqtatılırğa tieş dip uylıy.

Süriä räsmiläre İzrael belän söyläşülärne yañartırğa äzer bulularına işarä itä.İzrael Damask belän söyläşergä äzerme?

Audio (Peres) Bälkem dä süriälelärneñ söyläşüe üzgärgänder, säyäsättä üzgäreş yuq. Qayber terror oyışmalarınıñ başkvartiraları anda torırğa däwam itsä, söyläşü dä üzgärmiäçäk. Misal öçen Xamasnıñ başkvartirası Süriädä, cirle Xamas citäkçelärenä qarağanda başkvartira radikalleräk, bez moñı beläbez. Alar terrornı eksport itä.

Radiobız xabärçese Äxmäd Rafatnıñ Xızbolla kebek oyışma Iran tarafınnan yaqlana, sezneñ bu ilgä qarata mönäsäbätegez digän sorawğa Peres minemçä yaqın könçığışta in zur qurqınıç İran, ul terrornıñ üzäge Gazadan alıp Ğıyraqqa qädär törle urınnarda terrornı cäyelderä. Ayruça İran qulındağı atom qoralı yaqın Könçığış xätta Yevropa öçen dä qurqınıçlı digän cawap qaytarğan İrannan kilgän qurqınıçqa qarşı İzrael nindi çaralar kürergä äzerlänä?

Audio (Peres) İran İzrael öçen genä tügel ä böten dönya öçen qurqınıç täşkil itä, bez moñı İran-İzrael qısalarına taraytırğa telämibez.Başqa illär, başqa keşelär dä qatnaşırğa tieş. Bez başrolne uynamıyaçaqbız. Minemçä xärbi tügel ä iqtisadi häm säyäsi basım belän başlarğa kiräk.

Atom qoralları mäsäläsendä Tehran belän söyläşülär alıp barğan Britaniä, Fransiä häm Germaniä optimistik qaraşta kürenälär. Sez nindi fikerdä?

Audio (Peres) Alar bälkim dä kiläçäk turında optimistik , ämma ütkän öçen alar optimistik fiker beyan itä almıy, çönki İran küp kenä wäğdälären ütämäde.

Alar irtägä öçen optimizm beldersä dä kiçäge öçen pesimmistik qaraşta digän süzlär belän ängämäne tämamladı Shimon Peres.

Färidä Xämit
XS
SM
MD
LG